Tui-tō-hoē ê Si

Chiu Thian-lâi

1963.06.15  P.7

(Khé-sī-lio̍k 14:13)

T.L. Chiu 1960 Henri F. Hemy 1865.

1. Siàu-liām kè-khì chhin-lâng pêng-iú,

  Sim boē kìm-tit pi-siong iu-chhiû;

  Tī Chú lāi-bīn tāi-ke chhin-bi̍t,

  Saⁿ-kap kau-poê ēng sim sêng-si̍t;

  Chóng-sī hiān-chāi lī-pia̍t lán khì,

  Lêng-hûn tiàm tī Kiù-chú sin-piⁿ.

2. Sìn Chú ê lâng, mi̍h-sái hoân-ló,

  In-uī Kiù-chú sī lán só͘ khò;

  Bô-lūn sí, oa̍h, lóng ū pêng-an,

  Hióng-siū un-tián, hok-khì bô hān;

  Lêng-hûn lī sin thoat-chhut khó͘-hái,

  Chìn-ji̍p bêng-kiong êng-kng só͘-chāi.

3. Siàu-liām kè-khì Chú ê sèng-tô͘,

  Jia̍t-sim thiàⁿ Chú, kiâⁿ thiⁿ ê lō͘;

  Chun-thàn tō-lí, pò-iông Chú miâ,

  Kan-chèng hok-im, hó-táⁿ bô kiaⁿ;

  Khoàⁿ in só͘ kiâⁿ, tī toē-bīn-chiūⁿ,

  Si̍t-chāi choè lán chin hó bô͘-iūⁿ.

4. Taⁿ lán tāi-ke tio̍h siū an-uì,

  Gióng-bōng Kiù-chú thang tit un-huī;

  Khò I chiah ū éng-oa̍h ǹg-bāng,

  It-seng tè Chú m̄-sī khang-khang;

  Bô kú tāi-ke lóng beh saⁿ-kìⁿ,

  Eńg-oán an-hio̍h, khoài-lo̍k tī thiⁿ.

A-men.