聖哉。聖哉。聖哉！
這首詩是R.Heber所作的。伊是英國人，出世佇1783，卒業牛津(Oxfort)大學。伊做囡仔的時真gâu做詩。伊做詩到一世人。伊所做的較常是聖詩。伊佇英國的一所在做牧師16年久。做牧師的時伊真欣慕愛去印度。佇英國的時，伊不時看印度的地圖，想愛蹛遐通四界看遐的人的狀況。40 歲的時伊有受一个kam-tok牧師的命令，去印度的 Calcutta做遐的 kam-tok。3年久伊不時出外探教會。伊真熱心做主的工。有一日伊做工真thiám，轉去厝ni̍h 的時入去浴間洗身軀，一點鐘後，一个朋友來揣伊，總是看伊已經佇浴間內過往。
佇咱的聖詩的中間，兩三首是伊所做--的。這首是「天下遍遍逐邦國。人人心肝烏暗」這首是寫伊佇印度的時的經驗。閣一首就是「聖哉，聖哉，聖哉！全能大主宰」這首是將啟示錄4章8-11 的意思來寫伊所讀啟示錄所看見的形象。 |
