首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 數念好人好事
數念好人好事
卷期：第915期 本次： 日期：1963/8 刊名：台灣教會公報 頁數：10
篇名：數念好人好事 [ SIÀU-LIĀM HÓ LÂNG HÓ SŪ ]
作者：編輯部 Phian-chip-pō͘͘
  顯示 : 漢羅 全羅 並列  

數念好人好事

編輯室

  偕睿廉牧師略歷

  偕睿廉 (馬偕)牧師(Rev George william Mackay)，1882年1月22號，出世佇淡水，是北部頭一位宣教師偕睿理(馬偕)牧師(Rev. George Leslie Mackay)的囝。  佇香港 (Hong Kong)讀維多利亞(Victoria)學校，後來去加拿大入聖安得烈(St. Andrew's College)中學，多倫多 (Toronto)大學，去美國Massachuset省Khek-lat-khek (Clark)大學。1910年得著B. A. 1911年研究院得著M. A. 1911年6月佮羅Jîn-lī (Jean Ross)結婚。

  1911年10月受加拿大長老教會派做宣教師。1911年12月到淡水。準備開設中學，1914年4月淡水中學開校；也任校長，(是頭一間5年制的私立中學)，以後任校長久久。伊倒去歇睏的時，也捌去Westminster神學院深造。 (彼時院長是出名的Dr. Machen)。

有對加拿大Lo̍k-sū(Knox)神學院受D. D.神學博士。1940年倒轉去，有去南美Giana任中學校長。

  1946年閣來淡水，幫贊淡水中學。伊的工作是佇教育佮傳教，總是伊也是翻譯白話字聖經的一个委員。1952年退休，退休了猶原歡喜繼續傳教到最後。伊有設一間中心佇淡水，培養濟濟婦人人得著聖經的知識，對全省各所在攏有人來讀，讀了轉去幫贊教會的傳教。伊也有設佈道所佇小基隆佮興化店。

  1963年7月20號，佇馬偕醫院過世，享受82歲。 21下晡對台北運棺到淡水。淡江中學的校旗帶喪章到街路口迎接。22下晡佇淡水教會舉行教會葬，然後才葬佇淡江中學內的馬偕墓地，安葬佇老父的身邊。教士會母會代表àn Pó-lí牧師主持安葬禮拜。參葬的人有總會，Tāi，中會，聖經公會，淡江董事會的代表等，1000外人參加。淡水有一條街叫做馬偕街，是因為數念in父囝對文化上的貢獻來號的。

 

世界最遠的出山。

  佇7月22號下晡4點，佇台南市外Ná-poa̍t園的橄欖山，遐有一具對美國運棺來的棺木佮身屍佇遐埋葬。葬式的時有本省人，有外省人，有美國人，也有英國人，日本人，約欲4, 500人去參加。這次的出山，一khùn對太平洋的東爿岸美國的所在用飛機運來到台灣，總共欲到15000 mai的遠，通講是一次世界最遠的出山。

  怎樣thái會出山來到遮遠的所在neh。若有看新聞的人穩當攏知，伊是一个橄欖山靈修會場的創始者，魏德凱牧師娘。

  伊今年才45歲，有留魏牧師佮一个後生14歲佮兩个查某囝11 歲，8歲。  魏牧師娘是牧師加的孤生查某囝，自細漢8歲的時，因為聽著中國內地會的宣教師，報告佇中國傳道理的情形，受著感動，就奉獻愛做中國的宣教師。到長成讀聖經學院，讀大學都攏無放拺這个志望。魏牧師是讀化學工程的，總是後來夫婦同心獻身參加佇內地會，來到中國四川傳道理。

  民國37-38年大陸淪陷，魏牧師夫婦一旦轉去美國，後來閣來台灣，佇台南閣開始傳教，直到現在。

論起魏牧師夫婦的傳教，實在有夠誠心，有夠熱切，尤其是in對青年學生的愛護是夠額予接受著的人終身數念。又閣牧師娘本身也欲做主婦，也欲做老母io三个囝，閣欲做牧師的秘書，猶過本身有時到省立女中，有時到光華女中教英語查經班，有時開主日學佮兒童佈道班，而且魏牧師所設的校友團契，對青年學生傳道的工，差不多毋捌一擺伊綴無著。

讀本報的人敢少人會記得佇1956年的1月號有一篇「美國的主日學，」這篇就是魏牧師娘寫--的。  筆者託伊寫這篇稿以後，魏牧師無拍算予蘭醫生宣告講有染著肺病，著停工歇睏。夫婦兩人大受打擊，閣決定欲回國靜養，猶過魏牧師娘因為欲照約束，所以佇一兩點鐘久的中間就用typewriter拍了了，提來到予我翻譯通落報，這就通看出伊的做工的精神佮能力。

一家回國了，佳哉魏牧師有較勇，一家就閣chhoā來。總是做工年外久，牧師娘受檢查又閣發現著講有子宮癌。  Taⁿ一家閣受試煉，就閣chhoā轉去打揲症頭。

真奇妙，子宮癌症無閣發展自按呢好去，一家又閣相chhoā來台南。病中真濟朋友，親戚共伊探病，慰問金錢。牧師娘毋甘用，就攏寄付來建設一个靈修會場。

  橄欖山的創設，就是對按呢實現出來的。

夫婦用橄欖山做中心，奔走打拼的時，無拍算大試煉閣到，這次講是肺癌，怎樣試煉會遮重ah。

In的傳福音是真熱烈，真有效果的，總是in的試煉是若親像約伯所拄著的。結果又閣著回國，閣teh掛慮驚了這次轉去敢袂通閣相見。總是回國了病逝就無閣進行。牧師娘心心念念都是數念中國，數念台灣佮橄欖山，所以看病狀無真沉重，就佮一家佇今年頭閣帶著病的身軀冒險來台灣。

可惜來到位，醫生無准伊做工，自按呢繼續養病的生活，總是牧師娘的精神真飽滿，因為無需要不時倒床，所以不時笑gī-gī，接人客，寫字，拍typewriter，按呢做工。到佇最近一面身軀加艱苦，一面聽見美國有身的治療法，所以才閣轉去美國就近醫生。可惜病前已經沉重，佇這个7月17號才過世。

這次遮裡遠的出山，是照伊的遺願來做的，身屍棺木對美國用飛機載來，著經過欲到一萬五千mai (英里)。

  Taⁿ伊的身軀有葬佇中國的土地裡，永永遠遠做橄欖山的土。

看著滿心誠實熱切的魏牧師佮三位細囝綴佇棺木teh出葬，大家無毋替in同情。求上帝憐憫。

 

  「伊雖罔死猶過teh講話」

  佇7月18號，佇安平教會有開台南中會的教員講習會。會中有一个真正嚴肅感動人的節目，就是佇17日忽然殉職過世的宋Choân-liông長老的講演辭。  題目是「主日學管理法，」原稿共欲到4000字，差不多逐句寫。因為宋長老兼南門主日學校長，對工作認真勤勉，受聘所備辦的講演，確實有夠額通啟發人。當日將伊備辦的講演稿讀予人聽，閣較予人感動，也相信「伊雖罔死猶過teh講話。」

  Taⁿ這个宋長老不幸佇7月17號，佇伊所主持的中國化學製藥公司台南營業所，因為業務上的事受部下誤解佮怨恨，紲用凶器共伊刺傷致死；消息一下傳出，予親疏，遠近的人無毋為伊大毋甘哀惜。宋長老是本社前工場主任宋水琴先生的第3公子，鍾茂成牧師是伊的姊夫，高昭龍牧師是伊的妹婿，兄是宋Choân-chiong長老，小弟宋泉盛牧師現時佇美國研究中，本身是本社高德章先生娘的第2囝婿。

伊做人溫純閣慷慨。對事不止有才能，而且對人有基督徒的好模樣。讀長榮中學煞，到taⁿ無論食頭路，無論做事業，都有真優秀的表現。佇中國化學公司台南營業所經理任中的業務成績特別優秀，有將營業所的月收約20萬提高到平均180萬，而且有捌到430萬箍。

 對教會捌做台南南門教會青年團契會長，執事，長老，主日學校長，也當南中P. K. U. 會計佮長榮中學的董事，基甸會的理事等。所有擔當的工，毋捌一項無收成著好的成績。

  Taⁿ當年輕力壯41歲，猶過上主事先煞伊世間的工。

  著傷到死的2點外鐘久的中間，也吩咐毋通去報案，意思是無愛追究，愛赦免，因為看兇手所做的事出佇毋捌，閣連聲只有叫主啊，主啊，紲交代看顧細囝，就離開世間。  遺族是惠珍女士佮大漢女子11歲，細漢男子7歲。

過身了才發見著無論公，私，數項逐項都清清楚楚。P. K. U.的會計講赤字50幾箍，老爸講咱著提去共獻，毋通 予 P. K. U. 開無夠；無拍算故人佇在生已經將紅字家己先整錢完清楚lah。

二十二號，佇南門教會告別式，參加的人欲到500人。逐人都為伊的死來流毋甘的目屎，也為伊所留的好模樣來感動。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461