首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 夫婦的問題
夫婦的問題
卷期：第916期 本次： 日期：1963/8 刊名：台灣教會公報 頁數：6
篇名：夫婦的問題 [ HU-HŪ Ê BÛN-TOÊ ]
作者：吳清鎰 Gô͘ Chheng-ek
  顯示 : 漢羅 全羅 並列  

 

夫婦的問題

吳清鎰

 1963.08.15   P.6-7

我的會友有一對夫婦不時冤家，激氣，無講話。這都毋知欲怎樣共in指導？

若有信徒夫婦不時冤家，激氣，無講話，著共伊指導。若無共伊指導，第一，無榮光主；第二，會予家庭失落溫暖，並且對兒女的教育上無好影響；第三，會發展到家庭破裂。總是欲共伊指導的事先，第一，著了解夫婦不調和的種類是屬佗一款；第二，著查考彼个原因是甚麼。後來才會知影著用甚麼方法來共伊指導。

I. 種類。夫婦間的感情衝突無講話，大概有下面所排列的種類：

(1)為著極小可的事，夫婦間意見無相合，發生了感情上的衝突，兩人的無講話是暫時，連鞭閣照舊講話； (這是無心適的程度)。

(2)為著一方所做的事予另一方不利，發生激烈的爭執，好久無講話，總是為了愛情猶佇teh，雖然常吵鬧，亦閣講話(這是夫婦不睦的程度)。

(3)夫婦的愛情已經失去，濟濟年無講話，卻無離婚，這事情極嚴重(親像地獄的程度)。

II.原因。夫婦感情衝突，無講話，有真濟的原因，總是主要的原因，大概會通分做相款:

(1)為著教育程度，想法，趣味，習慣，性格等的無相款，致到發生意見，感情的衝突，會造成夫婦間的一時tek無講話。

(2)為著物質上，á是精神上的利益的衝突，爭執，無欲相讓，致到感情上的不睦，就幾若日，á是幾若禮拜無講話，比第一類加真嚴重。

(3)對佇一爿，á是雙爿都失去愛情，á是佇性的方面無滿足，大家都希望離婚，總是因為事情毋容允袂得離婚，致到久久，幾若年，十外年無講話。

III.指導。夫婦是一體，五倫中做第一親密的關係。雖然是按呢生，總是夫婦亦會發生感情上的衝突，激氣，無講話。這款的現象實在真毋應該，總是事實上常常有這款的現象。有人講夫婦間有時無講話亦有好處。因為這是一款的冷戰， 通閃避熱戰。亦有人講：是一款的示威，促使雙方有一个反省的機會，後來感覺無講話的不方便，雙爿就會落軟閣講話，感覺相佮講話，有講：有笑的快樂，佮翁某相好的寶貴。雖然親像亦通按呢說明，總是其實翁某無講話是毋著，是不正常，而且有時會誤了大事。若信徒夫婦亦冤家，激氣，無講話，雖然是暫時tek，亦一定袂會榮光主，會受人指責講：基督徒佮非基督徒攏siāng款，攏無精差。Taⁿ咱欲怎樣來指導夫婦毋通冤家，激氣，無講話？欲指導夫婦袂冤家，激氣，無講話毋是容易的事，總是大概通分做兩款來想。

頭一款是屬頂面所講的第一類的，常常為著極小可的事激氣無講話。聽候你知影欲共伊指導的時，in已經閣講話lah。所以對這類的指導常常是事先的指導。我有一个朋友，講伊對結婚的時就決定一个方針，毋愛有佮婦人人無講話的歹習慣。所以逐擺鬧佮婦人人發生感情衝突，差不多一兩日無講閒仔話，(普通無講會做得的話)，要緊的話卻有講。總是按呢；伊猶原感覺真無心適。經過濟濟年了後，伊想講著根本消除感情的衝突較理想。所以伊以後對婦人人講話較細膩，是用溫柔的態度講：無用嚷--的.若伊的婦人人欲嚷，伊就恬恬，無應答，無嚷倒轉，後來才寬寬說明。對按呢，翁某兩人變做真好參詳，毋捌閣有感情衝突無講話。翁某兩爿攏著按呢相讓，用理智佮吞忍來贏過感情的衝動。我相信屬第一類的通用按呢來解決。第二款，是屬頂面所講的第二，三類的，是有厲害的爭執， 毋是單純的感情問題。所以著消滅遐的兩爿teh爭執的原因。種種各十个原因欲怎樣消滅，著翁某兩人有誠意欲合作來消滅，總是這是另外的問題。不過亦通照頭一款的所講：通用理智佮疼心出發，閣加添種種技術上的知識來解決屬佇較困難的問題。

最後閣加添幾句，欲消滅夫婦間的冤家，激氣，佮遮的種種的原因，著想講：我的翁，á是我的某是我本身的一半，亦就是我本身，所以我著盡量努力予伊無僫擔當的事，著顧伊的利益，予伊有較好的生活。所以伊若發脾氣，我毋通siāng時發脾氣。伊若誤會，我看寬 說明， 毋免著急。若我果然有錯誤，我著有勇氣承認，常常相知影對方的欠缺，相同情，體貼佮相幫贊，用真正的愛心相款待。按呢穩當會消滅冤家，無講話，佮遮的種種的原因。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461