Sèng-tàn Chiok-koa

900 kî 1962.12 p.20

Teng En̂g-lîm

1. Kiong-hí, kiong-hí, chin kiong-hí,

Kin-á-ji̍t sī hó ji̍t-chí;

Khèng-chiok Iâ-so͘ lâi chhut-sì,

Chit ê hok-khì toā bô pí.

2. Iâ-so͘ pún-lâi sī Siōng-tè,

uī-tio̍h beh kiù lán tāi-ke;

Hoaⁿ-hí tuì thiⁿ lâi kàng-sè,

Beh kiù sè-kan muí chi̍t ê.

3. Iâ-so͘ chhut-sì hit chi̍t sî,

Thiⁿ-sài tī thiⁿ iā hoaⁿ-hí;

Poàⁿ-mî lo̍h-lâi tàu gîm-si,

Pò lâng chai-iáⁿ I chhut-sì.

4. Khòng-iá bo̍k-chiá teh kò͘-iûⁿ,

Khoàⁿ-kìⁿ thiⁿ-téng ū koh-iūⁿ;

Hut-jiân thiⁿ-sài chiū chhut-siaⁿ,

Kiò in an-sim m̄-bián kiaⁿ.

5. Pò lín sè-jîn lóng chai-iáⁿ,

Kim-ji̍t tī Tāi-pi̍t ê siâⁿ;

Siōng-tè chhe-khián I Sèng-kiáⁿ,

Hō͘ lín tit-tio̍h sin oa̍h-miā.

6. Bo̍k-chiá thiaⁿ-liáu chin hoaⁿ-hí,

Suî-sî chiū khì chhē-tio̍h I ;

Chhē-tio̍h kám-kak chin hok-khì,

Suî-sî tńg-khì pò chhù-piⁿ.

7. Iâ-so͘ chhut-sì chin pi-bî,

Bô chhù khùn tī bé-chô nih;

uī-tio̍h beh kiù goá kap lí,

Kam-goān pìⁿ choè án-ni-siⁿ.

8. Tang-hng phok-sū in iā chai,

Sè-kan í-keng ū hó-tāi;

Chiū-sī Kiù-chú í-keng lâi,

Só͘-í tiau-kang beh lâi pài.

9. Lâi kàu lō͘-nih soà bê lō͘,

Kiâⁿ-lâi kiâⁿ-khì bô hoat-tō͘;

Kai-chài tit-tio̍h chhiⁿ chhoā-lō͘,

Chiah ū kìⁿ-tio̍h Chú Iâ-so͘.

10.Phok-sū kàu-uī chin hoaⁿ-hí,

Suî-sî kuī-lo̍h lâi pài I;

Phah khui lé-mi̍h chin kuì-khì,

Hiàn hō͘ Iâ-so͘ piáu kèng-ì.

11.Taⁿ lán khèng-chiok Chú Sèng-tàn,

Hoaⁿ-hí iá-so͘ lâi sè-kan;

I beh siúⁿ-sù lán pêng-an,

Thoat-lī thòng-khó͘ kap hām-hāi.

12.Lán tiàm sè-kan ū lô-khó͘,

Nā beh tit-tio̍h ū oá-khò;

Goá pò lín chi̍t tiâu oa̍h-lō͘,

Chhiáⁿ lín lóng lâi sìn Iâ-so͘.

(Toā-lāi: Teng En̂g-lîm).