GOÁ SÓ͘ CHUN-KÈNG SIÀU-LIĀM Ê SU-IÚ
Ông Chiàm-khoe
1964.01.15. P.8-9
7. Ong Bo̍k-su ū chin-choē te̍k-hāu ê pì-hng, khah choē sī chhiⁿ-chháu. I ê lâng ta̍k hāng to chim-chiok, bô hàm-hàm; chhiⁿ-chháu, ū hāng chi̍t hō chháu kuí-nā ê miâ, kok toē-hng bô siāng, ū só͘-chāi hō choè ia̍h-á-chháu, pa̍t uī kiò choè it-ki-hiang, iā ū chi̍t ê miâ ū nn̄g khoán chháu, só͘-í Ong Bo̍k-su i teh pò lâng, tio̍h kóng kàu chin siông-sè, tio̍h ēng iūⁿ-pún pò lâng khoàⁿ, ēng hoat iā kóng chin siông-sè. Lán lâng siông-siông kóng, "io̍h-á choē lâng bat, chia̍h boē kiâⁿ;" che sī àng-tō͘, in-uī kiaⁿ lâng o̍h--khì, i chiū bô thang thàn chîⁿ. Ong Bo̍k-su m̄ sī beh thàn chîⁿ, sī beh kiù lâng ê, só͘-í ài lâng bat, chin ài kà lâng; i ê pì-hng án-choáⁿ oē hiah choē, khah choē sī kap lâng kau oāⁿ ê, pí-phēng hit lâng ū pì-hng, lóng m̄ hō͘ lâng bat, i ū tāi-chì beh iang i, i chiū hù tiâu-kiāⁿ kóng, lí hit hāng io̍h-á kā goá kóng, goá chiah beh, nā bô goá iā m̄ kā lí i , hit chūn i chiah kam-goān kóng. Ong Bo̍k-su kóng, lán m̄-nā tio̍h kiù lâng ê lêng-hûn, iā tio̍h kiù lâng ê sin-thé, in-uī kiān-khong ê lêng-hûn sī toà tī kiān-khong ê sin-thé, só͘-í ài kiān-khong ê lêng-hûn, tio̍h ài ū kiān-khong ê sin-thé. Bo̍k-su ah, lí koan-sim kiù lâng ê lêng-hûn sī bô chhò, tān-sī i ê sin-thé kāu pīⁿ-thiàⁿ koh sàn-hiong, lí kiám m̄ tio̍h thoè i tàu siūⁿ lō͘, lí ū chit hō bián chîⁿ io̍h, sió-khoá io̍h oē i toā chèng. Ong Bo̍k-su tī 10 goā nî chêng ū chhut tī Kong-pò, teh kài-siāu chhiⁿ-chháu io̍h. Chhin-chhiūⁿ Thuí-thâu-lông, chí-ū ēng se̍k-hun, chio̍h-hoe(soé chi̍t piàn chuí hiat-ka̍k), soàn-thâu, bu̍t-io̍h（沒藥）tuî lâi kô͘, siat-sú oē chin thiàⁿ á-sī oē thò͘, chiah kā lì khí--lâi, kô͘ liáu āu-lâi oē tiàu kui lia̍p, á-sī chū án-ni soàⁿ khì, chin hó ēng, goá siông-siông ēng. Choâ io̍h iā chin koân.
8. Hó ê sian-siⁿ: Lūn i ê kà chheh.
(1) Cha̍p káu hè tī Kong-á-nâ kà sió-o̍h chi̍t nî.
(2) Sîn-ha̍k-hāu pit-gia̍p liáu, 23, 24 hè tī Sîn-ha̍k-īⁿ choè chō͘-kàu nn̄g nî, sī tī Têng-á-kha ke hun kàu-sek, iā miâ Lēng-toā-o̍h. I iā bat kà Tè I-seng ê Tâi-oân oē kap Chô Bo̍k-su ê Tâi-oân oē, (Chô Bo̍k-su bô tī Tâi-oân choè tio̍h kang chiū koh tò-khì tha̍k-chheh). I m̄-nā ū ha̍k-būn, sī gâu kà, koh gâu thiàⁿ ha̍k-seng, tuì ha̍k-seng lâu chin chhim ê hó-kám. Lī-khui Kong-á-nâ kuí nî āu, koh khì thit-thô, ha̍k-seng lóng lâi, kìⁿ-tio̍h ná thiⁿ-nih poa̍h-lo̍h ge̍h, hui-siông ê hoaⁿ-hí, mî-ji̍t lóng tè tiâu-tiâu, oē kóng boē liáu, sio-chiⁿ beh chhiáⁿ, ū-tēng ê ji̍t kàu, beh tò-lâi, ū ê chhiáⁿ bô, teh lâu ba̍k-sái, lō͘-bé koh lâu chi̍t ji̍t. Khoàⁿ-tio̍h in ê saⁿ-thiàⁿ, hō͘ lán siūⁿ ha̍k-seng teh thiàⁿ Iâ-so͘, sī in-uī Iâ-so͘ tāi-seng ū thiàⁿ ha̍k-seng. Ū sian-siⁿ bô thiàⁿ ha̍k-seng, á-sī toā soè sim, oan-óng ha̍k-seng, pa̍t ji̍t ha̍k-seng chìn-pō͘ sêng-kong ê sî, tio̍h m̄-tio̍h, i lóng chai, tuì sian-siⁿ lóng bô chun-kèng. Ong Bo̍k-su m̄-nā tuì ha̍k-seng, tuì hoē-lāi, tuì hoē-goā, kìⁿ-nā kap i ū chiap-chhiok tio̍h ê, put-lūn gín-ná, lāu-lâng, hù-kuì, pîn-chiān, gâu, ham-bān(sic) lóng siàu-liām i ê phín-tek tō-hēng, uí-tāi ê chong-kàu-ka, bô kiàn-siàu Siōng-tè ê tiong-po̍k.
Ū chi̍t siú si, chiong 培英牧師為卷首，以欽仰其靈程高及品德深.
培養身靈賴聖神。
英明視聽識真人。
牧羊盡職行天道。
師範堪誇耀主仁。
8. Ke̍k hoaⁿ-hí ê khoán: Ong Bo̍k-su chin gâu kóng khoe-hâi kóng, i bat khoàⁿ chi̍t lâng tha̍k i ê bûn-chiuⁿ, tng i tha̍k ji̍p sîn ê sî, in lāi-bīn lâng phâng chi̍t oáⁿ moâ-chî kap chi̍t phiat-á thô͘-tāu-hu thn̂g lâi hō͘ i chia̍h, i chi̍t chhiú the̍h chheh, ba̍k-chiu teh khoàⁿ, chhuì teh liām; chi̍t chhiú kia̍h tī, tuì moâ-chî chiū ó͘ chi̍t kô, thô͘-tāu-hu thn̂g m̄ kō, tuì o͘-ba̍k-poâⁿ ti̍t kō, chiū chia̍h, chia̍h kàu chi̍t chhuì o͘ mà-mà, in-uī sim put-chāi ian, si̍t jî put-ti kî bī, ū tiⁿ bô tiⁿ lóng bô kám-kak, lâng chiah kóng lí ê chhuì thái oē o͘ kàu án-ni, i chiah chai.
Hoān-sū ū sim kap bô sim ê cheng-chha chin bêng, chù-sîn tī bûn-chiuⁿ, bô koan-sim tī chia̍h, ùn tio̍h o͘-ba̍k lâi chia̍h iā bô kám-kak. Chit luī ê khoe-hâi sī Ong Bo̍k-su tek-ì ê oē-pìⁿ.
9. Soán-te̍k toā sim-pū: Ū chi̍t ê hó pêng-iú mn̄g Ong Bo̍k-su kóng, "Lí pêng-siông tuì Ji̍t-pún lâng bô hó kám, án-choáⁿ thái oē chhoā Ji̍t-pún lú-chú choè sim-pū, ìn kóng che iā sī Siōng-tè só͘ phoè-ha̍p ê; in-uī toā kiáⁿ Siu-bûn ài toà Ji̍t-pún, í-keng 30 hè lah, tng-sî Tâi-oân lú-chú tī Ji̍t-pún khah chió, chit ê sim-pū sī jia̍t-sim ê Ki-tok sèng-tô͘, goá ū ēng 3 ê tiâu-kiāⁿ hō͘ i ìn-tap:
1. Goán sī Tâi-oân lâng, kap lín bô siāng bîn-cho̍k, bô ha̍h.
2. Goán sī chong-kàu-ka, sī sàn-hiong lâng, só͘-í lí kè Siu-bûn kiaⁿ liáu oē chia̍h khó͘.
3. Siu-bûn sī toā kiáⁿ, só͘-í chiong-lâi ū ka-tiúⁿ koan-hē, tio̍h ài tò-lâi Tâi-oân.
Chit ê lú-chú ū hoê-tap:
1. Tuì Siōng-tè bô hun chong-cho̍k, bô pia̍t pang-kok, thiⁿ-ē chi̍t ke.
2. Lán m̄-sī tiōng hù kheng pîn, sī khoàⁿ sìn-gióng kap jîn-keh, Siu-bûn sī tông-tông chi̍t ê i-su, thài tio̍h kiaⁿ sòng-hiong.
3. Eng-kai tio̍h tò-lâi ê sî, goá tong-jiân hoaⁿ-hí tâng tiⁿ tâng khó͘ lâi chīn hū-tō.
Ong Bo̍k-su khoàⁿ só͘ ìn ê ū moá tiám, só͘-í chiū chún in chìn-hêng.
