首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 長執訓興會
長執訓興會
卷期：第581卷 本次： 日期：1933/8 刊名：台灣教會公報 頁數：16
篇名：長執訓興會 [ Tióng Chip Hùn-heng-hoē ]
作者：紀溫柔 Kí Un-jiû
  顯示 : 漢羅 全羅 並列  

長執訓興會

紀溫柔

1933.08  581卷p.16

I.開會.五月18號頂晡10點，台中中會第一區長執奮興會聚集佇台中拜堂。出席者43名。王Piān-lông長老主理，chhoā會眾禮拜；讀1 Lîm 4：1-5，勸勉會眾著學司提反的犧牲，用好嬴歹。厝邊有某人剾洗講，­「拜上帝káu，改歹。『伊用好意應講，』蓋乖。」後來伊家己歹勢，紲佮咱好交陪。所以咱綴主著khek-kí，gâu吞忍，行仁愛，就天父的聖名正會開闊佇地上。

    II.奮興.劉忠堅牧師用建立教會，做茶。伊所講的大要記佇下面：-

    1.大家甘願為主做工的精神。今仔日教會的現狀是大欠精神，毋是欠物質。這个會向望逐年會得開一擺，大家相勉勵，予心神較活動。教會若會建立，咱chiàⁿ有真的平安佮快樂。教會欲建立著有跤手齊備，比並時鐘逐項機器齊備，干礁外面的 chiam kiám一支就袂準。咱有學問，châi-tsîng完全，若毋為主做工，教會袂活。

早有馬醫生，甘牧師以及諸先輩，現時就有咱大家。

現時對西洋直直傳入歹風俗，若無遐的先輩來犧牲，今仔日的確無教會。咱也猶佇罪惡中，佳哉今仔日有咱大家。總是咱的責任是非常的重，因為台灣4百外萬的人，攏是咱的責成。所以咱著有甘願為主做工的精神，教會chiàⁿ會通開闊建立。

    2.著得聖神的氣力。

早120人佇耶路撒冷的樓頂，專心咧聽候對頂面落來的氣力。聖神一下到，聖會對按呢興起。咱今仔日來，也是欲聽候頂面來的能力到，就有通提出佇逐所在做光燈來救社會。因為世間的智識、學問、哲學、科學學得救人。彼得反悔了，得聖神了後，咧傳道，一日3千人反悔。所以咱欲做主的工，著得聖神幫贊，chiàⁿ 會得建立教會。

    3.著除去顧家己的心。當時教會興，所有的物攏公家用，無顧家己，gâu相疼。做第一害，就是顧家己。早亞西亞7个教會建立了，袂曉相照顧，教會毋但袂建立紲險倒。

最近美國的大銀行，為著誰的顧家己緊領轉去。羅斯福大總統講，所有的錢攏是國家的，限20日後，若人有一百箍佇厝內，欲罰金一萬箍。大家緊提出去寄，銀行對按呢閣開，袂倒。咱中會若逐个顧家己，無通提出，有大危險，所以咱攏著提出。因為咱所有的才情，銀錢攏是天父託咱所有的才情，銀錢攏是天父託咱管理若定。

某所在有一個王長老好額，毋過教會的經費一年出10箍若定。有一擺咧會議的時，我共伊講，你著出50箍也無過頭。伊歡喜，毋但按呢，以後我幾仔擺寫批共伊講，叫伊寄赴某所在偌濟，伊攏歡喜。按呢王長老對這日起，錢有重頭生。

咱不時有機會會通做主的工。我的老母是sàn-hiong，總是有熱心疼人的精神。汗籃抑到逐口灶去拾雞卵，袂來做宣道會費。所以

    (1)咱著專務主的教示，心志chiàⁿ會熱。我佇北部的時，常常呵咾南部教會，今毋知猶有無？大家致意有咧研究道理，抑是咧講閒話，食薰？

    (2)咱的所做著毋通予講道理的人拄著喙塞。現時逐所在攏是報到的好機會，所以咱著覺悟，捌道理，協力，好所行，gâu相疼，不時想愛救人，教會就會建立。

倫敦小會10 个長老攏是失業者，照理是袂通閣幫贊台灣，為著疼主，猶原閣援助。所以長執若無關心佇教會，無歡喜赴會，獻金，做工，干礁做名譽的。著家己緊辭職，毋通鎮位，若欲做，著盡忠，教會chiàⁿ會建立。心所願。

閣有幾位牧師講幾句感想的勉勵，然後停晝，受台中教會的候待，紲說謝。

    III.激勵.下晡有蘇Io̍k-châi牧師講演，任職者的天職佮責任，來激勵大家。

    (1)  任職者的天職。是真高尚榮光，天所賞賜。上帝特別揀召來做天國的欽差。體-thian soan-hoà的聖po̍k。

    (2)  任職者的責任。著傳福音。親像耶利米講，「無傳耶和華的話擋袂牢，心肝親像火著。」「保羅講，無傳福音有災厄。」所以任職者逐个著gâu做工佇上帝个國。閣著有同心，愛做好事的精神，chiàⁿ 袂辜負上主的恩典。

    IV.討論.(1)教會的組織佮鼓舞。方法若好，逐項欲進行真快。教會是用人，法，物來組織--的。代先有會友，規定法度，揀人當職。會友著納維持費。大家毋知有攏明白，有照按呢德行，咧鼓舞抑無？

    (2)青年會的組織。有所在是對小會生出佮任職者合作。有所在是青年家己發起，佮任職者，小會較無連絡。這兩款攏是為主，總是大家相連絡較好。

    (3)  向望神學校程度改較懸，予學生出業就有教師的資格，予教會便便通請做牧師，向望無久，攏無給費生。

    (4)著節儉.現時是世界的的歹景氣，逐項縮小，著有合理化的生活，親像喪喜事，現時較濟真浪費，是予咱經濟困難的原因，若會得簡單，奢侈費：聘金廢止是真好，嫁娶自動車兩台。喪事免連的。麻衫用記號；近--的，食飽才去會葬；遠--的；才鹹糜。若按呢教會也較袂艱苦。

    (5)現時就這佮生活難。Hi-hong傳教者，也著注意鬥援助會友的生活問題。

    (6) 基金的問題，要緊教會，中會，大會攏著設置。因為台灣的宣道會，也是對外國的基本來設。

    (7)早，教會基督化，心向上，凡事相疼，khek-kí，獻金是獻所未趁--的現時教會，社會化，心向世間，疼情退，現金是獻所有偆--的，有的連所有偆--的抑毋甘獻。甘願予囝孫做浪蕩子破費，有影抑無？

請大家想看咧。

    (8)佮會外的人嫁娶。現時濟濟做父母的人，無咧注意，將女兒嫁予無信主的人，來予毋捌真理的大家教示，實在墮落，宛然是失味的鹽。某長老講，伊的查某囝，就若飼咧做姑婆，也毋願嫁予會外的人，因為一个靈魂得著救，嬴過得著全世界。較濟攏是貪世間的物質，快樂，才會嫁會外的人。結局較濟無好。願大家注意深想。閉會。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461