Keng-chè-phín

1933.09 (Koà-Chhài-Chí Tē 92 Hō)

Koa Î-su

Hiān-sî lâng só͘ lim ê tê (Tea) ko-phi (Coffee) sī khah kuì. In-uī in ê bī chin phang, koh-chài lim liáu ba̍k-chiu oē khui , chiū-sī boē ài-khùn. Kì-chiá, siàu-kuī á-sī beh siū chhì-giām ê ha̍k-seng , kàu-sî lâi lim sī chin ha̍h, in-uī oē chō͘ in ê cheng-eng. Lūn tê kap ko-phi , goá lim khah bô ha̍h, ē-pō͘-sî goá nā lim , chiū thong-mî boē khùn-tit.

    (A) Bô keng-chè. (B) Hō͘ lâng boē khùn-tit. (C) Siáu-jî m̄-thang lim, in-uī oē-seng ū gāi. In-uī tê ko-phi, ū heng-hùn ê chit tī-teh. Taⁿ chhiáⁿ lín chhì-khoàⁿ, ēng be̍h-pho͘ chhá kàu chhiah-sek , chún ko-phi-hún. Kiám-chhái chha ko-phi bô loā-choē , nā-sī lūn keng-chè-huì, oē cheng-chha chiâⁿ pah pē, che sī phí-jîn siá su-ì lâi hō͘ lín choè chham-khó nā-tiāⁿ.

    1.Hiaⁿ-tī chí-bē chhiáⁿ lín thiaⁿ,

     Goá chhē kuí-hāng ê mi̍h-kiāⁿ;

     Chhiáⁿ lín ū sî hō͘ goá chhiáⁿ,

     Pò lín siáⁿ mi̍h lâi choè-chiâⁿ.

    2. Tāi-seng chhì ēng be̍h-pho͘-hún

      Bí-khng ha̍p-ēng choè nn̄g hūn;

      Ngó͘-kok kap tāu lâi géng hún,

      Chóng kóng chiū-sī khah tāng pún.

    3.Chiū-sī keng-chè ê mi̍h-kiāⁿ,

     Ngó͘-kok kap tāu lâi choè-chiâⁿ,

Soà lâi kóng bêng hō͘ lín thiaⁿ,

Lâm-iûⁿ ko-phi ia̍h boē iâⁿ.

    4.ím-liāu ko-phi tē-it kuì,

      Lim liáu boē khùn siōng khek-khui;

      Hó tê ko-phi lóng siāng luī,

      àm-sî lim choē ba̍k-chiu khui.

    5.Be̍h-pho͘ bí-khng ke̍k séng huì,

      Chí ēng chhá chhiah m̄-bián luî;

      Phàu sêng ko-phi ê sek-chuí,

      Chham thn̂g gû-lin chiah kah-chhuì.

    6. Tāi-lí kha-khì ê io̍h-luī,

      Séng-chîⁿ boé io̍h séng khai-huì;

      Siông ēng ê lâng ia̍h oē puî,

      Pang-chān phê-hu oē khah suí.

    7.Puî suí-kù sin ióng-kiāⁿ,

     Sîn jîn ê sū oē gâu kiâⁿ;

     Thian-chai toē-piàn boē tah-hiahN,

     In-uī khò Chú bô só͘ kiaⁿ.