首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 現代教會的缺陷
現代教會的缺陷
卷期：第679期 本次： 日期：1941/10 刊名：台灣教會公報/北部教會 頁數：23-25
篇名：現代教會的缺陷 [ Hiān-tāi Kàu-hoē ê Khoat-hām ]
作者：潘道榮 Phoaⁿ Tō-êng
  顯示 : 漢羅 全羅 並列  

現代教會的缺陷

台北：潘道榮

1941年10月679期      23-25

 

  1.失落體驗的信仰

真的宗教，完全的宗教，著親像三角形彼3邊攏齊備才會成立。就是：教理 (2)行為。(3)体驗。

路德馬丁佮Ka-lō͘-bín的宗教改革運動佇半途拄著盡磅，就是因為偏重佇一面。佳哉佇16世紀的後半，上帝有備辦拄好的先生來拍開彼个難關。

咱逐个基督徒，靈的最高的體驗，著準準閣好膽親像保羅先生講，「我猶過teh活，毋是猶原我，就是基督踮佇我teh活」。

  2.崁密教會特有的記號(特有旗印)

  相疼佮聖潔，是咱基督教特有的記號。初代教會，會堪得稱做理想的教會，就是因為對聖神有顯出這仁愛佮成聖的好果子佇teh。基督若講恁若相疼佮聖潔，眾人欲對按呢知恁是我的學生。就魔鬼也欲講，恁若怨妒無清氣相，眾人欲對按呢知，恁是我的學生。你是屬佇佗一爿？

  3.無要緊教會主要的目的。

教會主要的目的，就是傳福音。某先生講，近代教會的毛病，就是注重制度化，機關化，組織化。「將上帝的道理放下teh，來辨理食食毋合宜。」(使徒6：2)。

袂身孕的婦人人，伊家己掠做真無體面。教會無加添人額，是未懷孕的教會。

  文書傳道，是現在第一好的機會，總是少人欲利用。

  公報，是欲鼓吹基督徒信仰生活，成做真媠，真勇壯的信仰生活，紲會通招呼別人來入佇信仰生活。可惜真少人teh讀真殘念！(照9月號所發表，才有賣出1452份若定。)

對文書傳道若有人愛利用活命報(生命誌)。請才對以下的住所注文。

  台北市蓬萊町四十七番地 李 順 天 氏

今年12月祝聖誕號，欲加印較濟部通送人，請量早通知，才免失落機會。

  4.予聖神(基督)徛佇門外。

  老底嘉教會，就是現代教會的真相。In無接納聖神，予聖神徛佇門外彼个慘狀怎樣？

  (1)無冷無熱；(2)困苦；(3)可憐；(4) Sòng-hiong；(5)青盲；(6) 褪theh。

這款的教會thài會曉優裕傳教者：致意家庭禮拜啦？可憐啊！可憐啊！

  5.毋捌主耶穌的理想國。

主耶穌的理想國是甚物？就是馬太福音傳所講的天國，以及馬可福音傳所講的上帝國。今仔日的教會，就是主耶穌理想國的影。

到底彼个理想國的內容怎樣？(1)無相爭。(2)無利己心，(3)無階級的分別，(4)無重勢力；(倚靠勢力壓迫人的，到今仔日濟濟攏失敗，毋免聽候將來，這霎通看見)，(5)無生活上的煩惱。(6)無有不義佮不正佇teh。

以外欲講，猶有；總是按呢有夠額予咱知主耶穌所愛建設的理想國。遮的，佇現代的教會有實現，無？

有一項著會記得--的，主耶穌的理想國，是上帝teh支配，也著代先臨到佇你的心內。

  6.堂堂敢做十字架的對敵。

保羅先生為著這款的教會流目屎；因為in的結局，是沉淪(腓 3：18)。甚物是叫做十字架的對敵？就是反對基督的精神生活--的。換話來講，利己的，享樂的)，自己中心主義的生活，彼號。請去讀(2 提3：1，2)。

  7.對佇祈禱，讀聖經焦燥無味。

賀川先生講，欲救咱祖國，只有著祈禱。某先生講，寧可失落身軀的米糧，毋通失落靈魂的米糧(聖經)。

毋愛祈禱，毋愛讀聖經，會予咱的上帝大傷心，大失望。

最近英國神學博士ミツクレム掀開聖經來讀，紲祈禱講，主啊！我信你，請赦免我的無信仰。

現代的祈禱會，聖經研究會真冷淡，莫怪教會愛分群結黨。

  8.無尊重聖禮典。

基督教的聖禮典，就是洗禮佮晚餐。救世傳教這時，也已經知著受這个聖禮典。

  南北教會的信徒數，若有5萬來講，是只有一半有守這个聖禮典若定。「信來受洗禮--的，欲得著救」(Khó 16：16)。「無食人子的肉，無啉伊的血的人，無活命」(翰 6：53)。

  9.無嚴守聖日。

舊約的割禮，就是新約的洗禮。舊約的逾越節，就是新約的晚餐。舊約時代守拜六，新約時代守主日。這日是基督閣活的日，也是聖神降臨的日。有教派守拜六，就是對in無夠額深知舊約佮新約的重點佇佗落。若無守聖日--的，(7日頭一日)，就無份佇上帝祝福的信仰生活。

守時間的聖日--的，是真濟，專心守聖日--的，是真少。今仔日的教會，若無發展，墮落佇屬化--的，這是莫怪。

  高等法院長三好先生(三好退歲氏)，是一位熱心的基督徒。禮拜日的出席毋捌閬，時間若到，雖然有大官欲來揣--伊，伊招in相佮到拜堂有時共in會失禮家己去禮拜。

著會記得這日是上帝欲賜福的日。

現代教會的禮拜有真濟的缺點，欠莊嚴，禮拜用的材料薄弱，欠調和，音樂真貧弱......)；著深深革新--伊。

  10.陷落佇無感覺的罪。

先知瑪拉基有講當時上帝的選民有患著這款罪，也in家己毋知。若親像人患著癩ko病，用火燒，用針鑿也袂疼。簡單寫幾項就好，其餘--的，請家己讀瑪拉基全本(4章爾定)。

  (1)上帝雖然有疼in，in嫌上帝，僥疑上帝無疼in(1：2，3)。

  (2)看輕上帝(1：5，6，7，8)。所獻--的，是青盲跛跤的精牲，無清氣的餅。無獻第一好的囝兒予上帝，欲要求第一好的傳教者；這是萬萬不能。教會的獻金毋甘獻金票，是隨便揀一仙的貨幣來獻做窒額--的，袂少。

  (3) 偷提上帝的物(3：8─10)。著知舊約時代所獻的10份一，是新約時代所著奉獻的最小限度。偌濟基督徒誠心吟講，「我的錢銀獻予你」，也有按呢實行啊？

  (4)上帝的審判，in無感覺(4：1)。某先生講，世界的歷史，就是世界的審判。所以做基督徒，著驚惶ngia̍uh-ngia̍uh掣，來做成恁家己的得救(腓2：12)。

結論。今仔日台灣教會最大的課題，就是著除去教會一切的毛病。個個的教會合一，全體的教會合一，一切的機關合一。

精神若袂變，就雖然是有好的理想，也僫得實現。

  「洗清in的衫的人(毋但個人，團體也在內)，有福氣，欲予in有權佇活命的樹，閣對遮的門入城」。(啟 22：14)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461