Cha̍p-nî kan ê Kám-sióng
Tân Chheng-gī
1933.10 (Koà-Chhài-Chí Tē 93 Hō) p.22
Pak-pō͘ ê Kàu-hoē tuì siat-kàu kàu chit-tia̍p , ū 61 nî kú. Tuì thâu-chi̍t nî kàu 50 nî , í-keng ū tù chi̍t pún lio̍k-sú, choē-choē lâng ū tha̍k liáu, tāi-khài lóng chai-iáⁿ.
Tuì 51 nî khí kàu chit-tia̍p, chiū-sī chit 10 nî ê tiong-kan, ū thiaⁿ-kìⁿ choē-choē lâng teh kóng tang-sai, thiaⁿ liáu put-chí sim-sek, oán-jiân chhin-chhiūⁿ bîn-bāng-tiong jû-sū bāng ê khoán. Lâng nā thiaⁿ-kìⁿ chit khoán ê siaⁿ, sìn chit khoán ê oē, iā oán-jiân chhin-chhiūⁿ bîn-bāng-tiong teh thiaⁿ- kìⁿ siau-sit.
Lâng beh phoe-phêng kàu-hoē ê sū, nā m̄-chai-iáⁿ hit ê kàu-hoē ê thóng-kè, iā m̄-bat pān kàu-hoē ê sū, hut-jiân-kan sì-koè kóng Pak-pō͘ ê Kàu-hoē ê sū, cháiⁿ-iūⁿ bô chìn-pō͘, léng-tām, tò-thè, bô chi̍t uī chhin-chhiūⁿ Pa̍k-pō͘ hiah soe-bî, hiah léng-tām. M̄-chai kóng ê lâng sī tuì lâng thiaⁿ-kìⁿ, á-sī pún-sin khì tiau-cha-tio̍h.
Nā-sī pa̍t só͘-chāi ê kàu-hoē , pí Pa̍k-pō͘ 5 Kàu-hoē khah chìn-pō͘, goá m̄-káⁿ kóng bô ; chóng-sī kóng Pa̍k-pō͘ ê Kàu-hoē bô chìn-pō͘, tò-thè , goá káⁿ kóng sī huí-pòng nā-tiāⁿ.
Taⁿ goá ài chiong thong-kè kuí-nā hāng lâi siá tī ē-toé, pò tāi-ke chai-iáⁿ.
Tī 1922 nî,chiū-sī 10 nî chêng, niá soé-lé ê jîn-sò͘ sī 4117 lâng.
Kàu 1932 nî, ū 6376 lâng ; án-ni ke-thiⁿ sī 5 koah, chiū-sī ke ka-gō͘.
1922 nî , thèng-tō-chiá sī 2860 lâng.
1932 nî , thèng-tō-chiá sī 3873 lâng , iā-sī ke-thiⁿ.
1922 nî, Chú-ji̍t-o̍h seng-tô͘ sī 1855 lâng.
1932 nî, Chú-ji̍t-o̍h seng-tô͘ sī 3129 lâng , iā-sī ke-thiⁿ.
1922 nî, Lé-pài-tn̂g sī 49 keng.
1932 nî, Lé-pài-tn̂g sī 57 keng, iā-sī ke-thiⁿ.
1922 nî, Káng-gī-só͘ sī 3 keng.
1932 nî, Káng-gī-só͘ 15 keng, iā-sī ke-thiⁿ.
Só͘-í lâng beh sì-koè kóng Pa̍k-pō͘ ê Kàu-hoē tò-thè, soe-bî, bô chìn-pō͘, sī mâu-tún.
Taⁿ chit 10 nî só͘ keng-kè , oē-tit thang kàu kim-ji̍t án-ni, chin thang hoaⁿ-hí.
o̍h-tn̂g i-īⁿ, kàu-hoē ê gia̍p-sán lóng tī-teh. Ta̍k só͘-chāi ê Tông-hoē ū Gī-tiúⁿ thang chai-poê. Bú-hoē ê hō͘-oān ū kè-sio̍k. Kū-nî soà phài Chóng-hoē ê Gī-tiúⁿ , lâi hù Soān-chio̍h Hi-liân ê Kì-liām-hoē.
Lán tio̍h toā-toā kám-siā Siōng-tè.
Toā ǹg-bāng í-āu 10 nî oe tit-tio̍h koh khah toā ê chìn-pō͘ ; m̄-nā ke-thiⁿ 5 koah, ǹg-bāng oē pí 5 koah koh-khah ke.
