That ba̍t phoe-phêng-chiá ê It-hoat
Gô͘ Thian-bēng
1933.10 (Koà-Chhài-Chí Tē 93 Hō) p.22
Ji̍t-pún chhut-miâ ê sin-bûn, ‘'Si-sū sin-pò,'' muí-ji̍t ê se̍k-kan choá-siōng ū Bú-tîn San-tī (武藤山治)--sī ê suî-kám kì-sū(隨感記事). Tī chit khoán kì-sū ê tiong-kan , téng-pang i ū chiàu ē-bīn só͘ kù-chài án-ni kóng.
Eng-kok 19 sè-kí, ū chi̍t ê toā soat-kàu-ka, miâ kiò スパージョン. I tī lé-pài-ji̍t só͘ soat-kàu ê tō-lí, keh-jit suî-sî ìn kuí-nā cha̍p bān-pō͘ lâi pun hō͘ choân kok-lāi ê hi-bāng-chiá, án-ni hō͘ lán thang chai i sī kàu-ke̍k chhut-miâ ê soat-kàu-ka.
Chit ê スパージョン iáu-kú choè siàu-liân Bo̍k-su ê sî, ū chi̍t ê sin-sū choè i só͘ khiā-khí ê ケンブリツヂ teng ê koe-tiúⁿ(街長), siông-siông lâi tuì スパージョン kóng, Lí iáu siuⁿ siàu-liân, uī-tio̍h án-ni , lí ê soat-kàu chin-choē lóng m̄-tio̍h, ēng án-ni beh lâi tèng-chèng Bo̍k-su ê soat-kàu. Ū chi̍t ji̍t, chit ê koe-tiúⁿ lâi thàm スパージョン kóng, ‘'Thiaⁿ-kìⁿ kóng chêng lé-pài-ji̍t lí ê soat-kàu ū kóng, siat-sú chha̍t-á nā ji̍p khì thian -kok, phah-sǹg káⁿ-oē chhun-chhiú chhng-ji̍p thiⁿ-sài ê saⁿ-á-tē lâi thau-the̍h. án-ni lí ū kóng m̄-tio̍h, lí siuⁿ siàu-liân, lí kiám m̄-chai thiⁿ-sài ê saⁿ bô thīⁿ saⁿ-á-tē, ‘'ēng án-ni lâi hiâm chit ê Bo̍k-su. スパージョンthiaⁿ-liáu chū-chū jiân-jiân ,tuì i kóng ,''Heh, goá lóng m̄-chai-iáⁿ, chin to-siā lí ê chí-sī, āu lé-pài ê soat-kàu ê sî ,goá beh tuì chèng hoē-iú lâi tèng-chèng goá ê chhò-gō͘, án ni chīn lé-sò͘ lâi chiap-thāi i, soà sàng i tò-khì.
āu lé-pài ê soat-kàu chheng-chhó, kàu pài-it スパージョン koáⁿ-kín khì thàm chit ê teng-tiúⁿ. Teng-tiúⁿ chiū mn̄g kóng , Ū sím-mi̍h iàu-sū, スパージョンkóng , ‘'Koan-hē thiⁿ-sài ê saⁿ-á tē hit chân sū, ài lâi kā lí kóng, ‘' thiaⁿ án-ni ê sî, Koe-tiúⁿ tio̍h kiaⁿ ê khoán-sit, スパージョンchiū chiap-soà kóng ,''Lūn chit chân sū, tī cha-hng ê soat-kàu, goá ū tuì chèng hoē-iú kóng, Téng-ji̍t ū tn̄g-tio̍h chi̍t ê ンブリツヂ teng ê Koe-tiûⁿ , i ū kā goá kóng, thiⁿ-sài ê saⁿ bô saⁿ-á-tē, lūn thian-kok ê sū, i bô ài lín khǹg chhò-gō͘ ê tì-sek, só͘-í án-ni chí-sī goá. Taⁿ goá beh chiàu án-ni tèng-chèng goá chêng-pang ê soat-kàu; chiū-sī kóng, Siat-sú chha̍t-á nā bô koé-oāⁿ i ê sèng-chit lâi ji̍p thian-kok ê sî, káⁿ-oē thau chhoah thiⁿ-sài ê si̍t ê mô͘. Thiaⁿ Bo̍k-su kóng liáu ê sî,teng-tiúⁿ , chin tio̍h-kiaⁿ tuì Bo̍k-su siā-choē kóng,''Ah ,ah ! Goá m̄-káⁿ lah ,tuì taⁿ í-āu , lūn lí ê soat-kàu , goá bô beh kā lí tèng-chèng poàⁿ-kù.''
Tī sè-kan , ū chi̍t chéng ê lâng chhin-chhiūⁿ chit ê teng-tiúⁿ , siông-siông ài kóng êng-á-oē lâi phoe-phêng lâng. スパージョン Bo̍k-su ê kò͘-sū nā ēng ngī ê hoat-tō͘ , tng-bīn kap chit ê koe-tiúⁿ gī-lūn hit ê o͘-pe̍h ê sî , tek-khak sī bô thang hō͘ koe-tiúⁿ hâng-ho̍k ê só͘-chāi, m̄-kú u ēng í-siōng só͘ kóng chit ê teng-tiúⁿ hō͘ tāi-ke tit-tio̍h lī-ek. Chū-jiân tuì piáu-bīn khoàⁿ, chit ê bo̍k-su chin bô thé-biān ê khoán. Chóng-sī lán tio̍h chai bô hō͘ thé-biān būn-tê só͘ pé-pa̍k ê lâng, chiah sī uí-tāi.
iáu ū choē-choē ê kám-sióng , chóng-sī goá kóng kàu chia chiū hó, ǹg-bāng tho̍k-chiá suî-lâng ēng chit chân sū , choè chi̍t ê ín-tō-soàⁿ, siⁿ-chhut chéng-chéng ê kám-sióng lâi saⁿ-kap tit-tioh kà-sī.
