頭社教會
1934.12，no.597，pp.17
Chan，Pak tuî聯合佈道(對10：23-25號)，佇大內庄方面，24號早起，隊員一行訪問頭社教會佮訪問會友。
頭社教會是佇昭和3年建築--的，猶真新；總是彼个歷史是真舊。場所是佇大路頭，真向陽，宛然是頭社的嚨喉。遮是山間的所在，樹木不時青翠，清靜，真合敬拜上帝的所在。
現在有70外人咧禮拜，教勢不止順序。現時李同傑先生佇遮咧牧會，伊做工倚30年久，為主咧干證道理。社內青年真濟，不止咧欣慕青年傳道師來活動，的確有通向望。
Thâu-siā Kàu-hoē
1934. 12, no. 597, pp. 17
Chan, Pak tuî liân-ha̍p pò͘-tō (tuì 10:23-25 hō), tī Toā-lāi chng hong-bīn, 24 hō chá-khí, tuī-oân it-hêng hóng-mn̄g Thâu-siā kàu-hoē kap hóng-mn̄g hoē-iú.
Thâu-siā kàu-hoē sī tī Chian-hô 3 nî kiàn-tiok--ê, iáu chin sin; chóng-sī hit ê le̍k-sú sī chin kū. Tiûⁿ-só͘ sī tī toā-lō͘-thâu, chin hiòng-iông, oân-jiân sī Thâu-siā ê nâ-âu. Chia sī soaⁿ-kan ê só͘-chāi, chhiū-ba̍k put-sî chheⁿ-chhuì, chheng-chēng, chin ha̍h kèng-pài Siōng-tè ê só͘-chāi.
Hiān-chāi ū 70 goā lâng teh lé-pài, kàu-sè put-chí sūn-sū. Hiān-sî Lí Tông-kia̍t Sian-siⁿ tī chia teh bo̍k-hoē, i chò kang oá 30 nî kú, uī Chú teh kan-chèng tō-lí. Siā-lāi chheng-liân chin-chē, put-chí teh him-bō͘ chheng-liân thoân-tō-su lâi oa̍h-tāng, tek-khak ū thang ǹg-bāng.
