Toā-lāi Kàu-hoē
1934. 12, no. 597, pp. 17-18
Lāi-chng ê lâng put-chí him-bō͘ tō-lí, it-poaⁿ ê lâng chin ū lí-kái. Hiān-sî lán ê Soat-kàu-só͘ sī tuì Cho͘-ha̍p-tiúⁿ Iûⁿ Hûn-siông Sian-siⁿ, bû-liāu chioh lán ēng; iā lú thoân-tō-tō[sic.] ê siok-sià iā sī tuì chhù-chú Lîm Chheng-tiong kun bû-liāu chioh lán ēng, si̍t-chāi tio̍h toā-toā kám-siā Thiⁿ-pē kap kā in jī-uī seh-siā.
Hiān-chāi muí lé-pài ê chhut-se̍k ū 40 goā miâ; tī hiu-hā tiong ū chhiáⁿ Sîn-ha̍k-seng Chiong Bō͘-sêng kun kap Gô͘ Tek-goân kun lâi chò kang, khui Hā-kî ha̍k-hāu, muí-ji̍t oá 50 ê gín-ná lâi tha̍k-chheh, sêng-chek put-chí hó.
Tuì 10 goe̍h 23 kàu 25 hō, tī chhī-tiûⁿ-piⁿ ū khui Pò͘-tō-hoē, chng-bîn chin chàn-chō͘, put-chí sok-chēng lâi thiaⁿ, sui-jiân sī kàu boé, iáu ū 50 goā lâng teh thiaⁿ. Chit pang tī Toā-lāi hong-bīn pò͘-tō 3 àm, kóng 5 hoê, thèng-chiòng ū 530 ê.
Chit pang ê pò͘-tō-hoē, ū siū-tio̍h Iûⁿ Hûn-siông Sian-siⁿ, Tân Kim-póng Sian-siⁿ kap Koeh Thian-in Sian-siⁿ, in chin toā ê hō͘-thāi, í-ki̍p hoē-lāi hoē-goā ê pêng-iú chin toā ê oān-chō͘, tì-ì kā in seh-siā kap kiû Siōng-tè si-un sù-hok.
