首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 是舊iáu-kú永新
是舊iáu-kú永新
卷期：第289卷 本次： 日期：1909/4 刊名：台南府城教會報 頁數：29
篇名：是舊iáu-kú永新 [ Sī-kū iáu-kú Eńg-sin ]
作者：
  顯示 : 漢羅 全羅 並列  

是舊猶過永新
1909.04 289卷 p.29-30
人ê風俗無相親像；iáu-kú有一項相親像，就是逐國ê百姓真tuì重舊ê物，也新--ê物猶原真ài。
有甚mi̍h古蹟，古早所起ê厝，抑是炮台、銃櫃，雖是這tia̍p無teh用，iáu-kú較常ài細膩照顧，m̄ ài拆。抑是有甚mi̍h古董人真ài看。有甚mi̍h風俗萬古流傳，人就ài趁。有甚mi̍h古人言就ài講；有甚mi̍h故事，ài聽。
有時百姓刁故意起宮beh囥古董hō͘人看。親像日本國ê京城有起一間大樓thang té逐項ê古董，從中有日本ê 皇帝古早所坐ê轎，真大頂，也有古早人所用ê ke-si。
英國有起真濟間大樓來té古早人所用ê ke-si器械。有甚mi̍h古祭ê衫、銃、刀、火車，攏囥tī hit內底；也有古早名聲ê讀冊人、做詩ê人，親筆所寫ê詩詞。有時beh賣，hit號ê筆跡值--著幾若千箍，幾若萬也敢。親像前年有一本細本仔冊，賣30萬銀。
英國也有真濟khám店專工teh賣古董。親像咱beh寄批hia-ê尪--仔頭無甚mi̍h值錢ê物，一張3點錢nā-tiāⁿ；iáu-kú hiah-ê舊--ê現此時咱較罕--tit看見，也人真ài拾；前日新聞報teh報2張賣$6000。
舊ê物人也真ài,新ê物也是真ài。物若較時行人ài用，衫若較時色人ài穿。若有甚mi̍h m̄-bat看ê物，不論火車、電氣車、獨輪車、輕氣球，就有人相爭beh看。抑是有甚mi̍h罕--tit聽ê事甚mi̍h新ê消息人猶原真ài聽。
今你若ài舊ê物，道理是真舊，ài新ê物，道理是極新。ài聽人講古，道理就是極古早ê事，ài聽新ê代誌道理是好ê消息，關係咱大家歡喜。
道理是講上帝。有時人teh問，孔子較早抑是上帝較早。上帝較早。孔子也有講上帝。上帝比堯舜iáu較早。堯舜也拜上帝。上帝比中國、比英國、日本國，逐國，koh較早。
天地較早，抑是上帝較早？上帝較早；上帝是創造天地，萬物ê神。
上帝tī時生日？上帝無生日。伊若有生日就有父母、祖公；父母祖公較大，較早。M̄-kú上帝kài第一大，上第一早，起頭ê起頭。上帝是無起頭ê上帝，第一古早就是伊。
你若ài聽人講古，講上帝就是講古。
今仔日上帝tī tó位？今仔日上帝tī-chia。這-tia̍p我teh講話是因為上帝tī--teh teh庇祐我，伊若無tī-chia，我liâm-piⁿ死翹翹。甚mi̍h人chhoā你來到這tè?就是上帝chhoā你來。咱逐日teh食是食上帝，teh穿是穿上帝，teh用是用上帝。
今仔日有甚mi̍h消息？就是講上帝tī chia。
M̄-kú上帝tī-chia，tuì tó位thang知真正有影是án-ni ？都m̄ bat看--見。
今ài beh明白這層ê道理，著代先講這層故事。早早m̄但中國人認天等一個主宰，照看別國，親像天竺國（印度）猶原是án-ni認。M̄-kú大家棄真歸邪，到2000年前無甚mi̍h人認上帝，只有一國nā-tiāⁿ，就是「猶太國。」上帝用濟濟項各樣ê法度，koh用聖人濟濟，教示in知影，別國那離開上帝ê時，in一國那得--著thang堅固信，真正有影有一個上帝。Tuì 2000外年前in攏m̄-bat giâu疑；反轉拜佛，in甘願死，定著m̄拜別物ê神明。
iáu-kú百姓無夠額明知，所以到時上帝差一個耶穌來，thang教示in，koh chhoā in kap上帝親近。
耶穌來偌久？今年是明治42年，也是宣統元年。到今年耶穌降生已經1909年。耶穌來猶太國出世，koh tiàm tī世間30外年久，四界講道理，講lín著變心，也著靠我，我就會chhoā lín轉--來去天堂。上帝是我ê父也是lín ê父，lín若ài beh到tī伊所toà ê所在著靠我；若無我就無路。耶穌也醫病趕鬼，叫死人koh活。有人信，也有人怨恨，kā伊掠釘死tī十字架，埋落墓，埋三日就擱活，然後上天。
上天ê了後伊ê學生就出力傳：一日ê中間有3000人信。有ê猶原做對敵掠學生來扑、關、thâi。從中有一個官出外50鋪路beh堆hiah-ê信耶穌ê人來掠關監，若是路--ni̍h日中晝ê時看光比日koh較光，koh看耶穌顯生續聽伊ê聲問：「某人你啥事ài害我到án-ni？」 官就應講：「主--ah，你是甚mi̍h人？」。應講：「我是耶穌」。Tuì hit日hit個官來信耶穌，好膽干證伊ê名，四界傳教tī幾若國，信ê人那濟，煩惱ê人得--著歡喜，歹人變做好人。
án-ni簡簡講一層故事m̄-kú道理m̄是講古nā-tiāⁿ，是講今若日ê事。是講今若日咱不論甚mi̍h人若信耶穌，就今若日咱ê罪會得--著赦免；koh今若日信，就今若日得著上帝ê好神來toà tī咱ê心kā咱計換性情，改舊換新，棄邪歸正；koh今若日信就e昏若不幸死liâm-piⁿ會到天堂。
這個道理今已經傳真久，beh 2000年久，iáu-kú是那親像新新ê道理；逐日有幾若百人，幾若千人也敢，聽了就講，佳哉，佳哉耶穌來替我死！台灣逐日chhe-ûn 有差不多5人來信耶穌。日本也是án-ni。中國逐日káⁿ有200外人來信耶穌。中國逐日有人聽鴉片，m̄愛poa̍h-kiáu,m̄愛做歹子。
英國、美國、德國、瑞典國、荷蘭國、丹國、法國、瑞士國，昨昏有人真餒志今若日聽這個消息就歡喜到流目屎。昨昏有人想beh行短路、弔家禮、食毒藥、割頷頸、跳落水死；boē前boē tuì拜堂口過，聽人teh吟詩，入去聽，聽了信；今若日滿心平安講，我有得--著永遠活！
昨昏有人食酒醉，醉退就發願講，我m̄ koh食酒；無采工，hit個人發願m̄若50擺。今仔日伊有koh食酒醉慘--ah！恭喜--ah！今仔日路尾擺；今仔日伊有來靠耶穌，一世人hit個人m̄ koh食酒醉。
昨昏有人做賊；今仔日m̄是賊，是做耶穌ê百姓；昨昏暗伊有來信靠救主，逐項攏換新。
昨昏tī南洋ê海嶼，生番有kap生番teh相thâi,kā伊thâi去食。路尾擺，今仔日有聽好ê消息，然後m̄ koh相thâi,逐項攏換新。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461