Soat-iàu-lūn
1909.04 289 koàn p.32-33
Tī chá-nî ū chi̍t ê siàu-liân hū-jîn- lâng sèⁿ Kám, miâ Kek. Tuì sè-hàn chhin-kīn lú-o̍h, siū sian-seⁿ ê kàu-hùn, ji̍t-ji̍t ha̍k-si̍p tō-tek, put-chí ū lêng- khiáu, koh chē-chē lâng o-ló i ê lú-tek. Taⁿ í-keng tha̍k-liáu chut-gia̍p, chiū tò- khì tī i ê pún-hiuⁿ; bô loā-kú i ê sī-toā- lâng kā i phit-phoè hō͘ chi̍t ê choh- chhân-hu. Pêng-sò͘ hit ê choh-sit-lâng sī tē-it gâu kek-khì, ia̍h bô siū tō-lí ê kà- sī. Ū chi̍t ji̍t i ê hū-jîn-lâng ēng tō-lí khó͘-khǹg i, bô gî-gō͘ siông-siông kap i chò tuì-te̍k. Goân-pún sī ǹg-bāng beh ín-chhoā i ê tiōng-hu nn̄g-lâng ē lâi saⁿ- kap sìn Chú, ta̍uh-ta̍uh ēng un-jiû, khiam-sùn chò bô͘-iūⁿ hō͘ i khoàⁿ; nā-sī lóng bô chhái kang, tì-kàu i-ê hū-jîn- lâng ti̍t-ti̍t tàm-chì, soà liân i pún-sin ia̍h choa̍t-bāng. Koh ia̍h bô ài kā i lí-ke, ti-tu keⁿ-si thô͘ eng-ia lóng pàng kù- chāi i. Goân-pún sī chheng-liâm pe̍k-iāu ê jîn-châi; taⁿ soà pìⁿ chò thô͘-gû sio̍k-thún, chē-chē lâng hiâm, chió lâng o-ló. Che chiàu lán phah-sǹg, kiám m̄-sī bô hoat-tō͘ thang koh-chài ho̍k-tò i ê sēng-tek mah?
Kai-chài ū chi̍t-uī thoân tō-lí ê lâng, sèⁿ Kéng, miâ Kài, i siông-siông chhut- goā kóng tō-lí hō͘ lâng thiaⁿ. Só͘ kiâⁿ ê lō͘ bô-tiāⁿ bô-tio̍h, chhàu-tú-khám ū chi̍t ji̍t teh beh kiâⁿ tuì hit ê hū-jîn-lâng in tau koè. Tī hit lō͘-ni̍h gū-tio̍h ià-siān, koh chhuì-ta, khoàⁿ-kìⁿ kīn tau ū chi̍t tè chhù, chiū oat-ji̍p-khì beh chiām-sî kā in chioh hioh, ǹg-bāng ē tit-tio̍h tām-po̍h-á chuí thang chí chhuì-ta, bô gî-gō͘ hit ê siàu-liân hū-jîn-lâng chi̍t-ē khoàⁿ-kìⁿ suî-sî siám-pī. Kéng Sian-seⁿ chiū kā chi̍t ê sè-hàn gín-á thó khoàⁿ ū tām-po̍h-á chuí thang lim á-bô? Hit ê gín-á suî-sî iúⁿ lâi hō͘ i. Kéng Sian-seⁿ siông-sè khoàⁿ in ê lāi-thâu bô sím-mi̍h chheng-khì-siùⁿ, chi̍t sì-kè choan ti-tu-si, chiū khoàⁿ-kìⁿ tī phian-phiah ê só͘-chāi ū chi̍t nn̄g pún ê Sin-kū-iok, ia̍h ū kuí-nā pún sī Kàu-hoē lāi khah siông ēng ê chheh. Khoàⁿ liáu bē bián-tit lio̍h- á gông-ngia̍h, koh chi̍t sì-kè kā in khoàⁿ khah chin, to ia̍h bô ho̍k-sāi chhâ-thâu-pu̍t. Kéng Sian-seⁿ lio̍h-á jīn-kìⁿ hit ê hū-jîn-lâng tī kuí-nā nî chêng ū bat lâi bó͘ kàu-hoē lé-pài, chin-chiàⁿ ū khiân- sêng chin-si̍t ê sim-koaⁿ. Nā-sī Kéng Sian-seⁿ siūⁿ ài beh kā hit ê hū-jîn-lâng chhì-mn̄g khoàⁿ chiah-ê chheh sī tuì tah-lo̍h tit-tio̍h, hū-jîn-lâng lóng m̄ káⁿ chhut-lâi.
Thêng ū chi̍t-sî kú Kéng Sian-seⁿ beh khí-sin ê sî, chiū kā chit ê sè-hàn gín-á seh to-siā, soà kā in kóng, Tī lín chit lāi-bīn ū pó, ì-sù sī khoàⁿ in ê lāi-bīn kàu-gia̍h lâ-sâm ù-oè, kiám-chhái liân in ê sim-koaⁿ ia̍h sī án-ni, nā bô thài káⁿ pìⁿ chit hō hêng-tōng kú-chí leh? I taⁿ kā in kóng, Chit lāi-bīn ū pó, in tek-khak ē lâi péng-chhoē, sè-kan lâng tē-it tuì-tiōng ê chîⁿ-châi, péng nā bô chiū tek- khak ē hian-khui chiah ê chheh lâi tha̍k, nā tha̍k ê sî Siōng-tè ún-tàng ē khui- khé i ê sim-ba̍k, hō͘ in ē chai choē thang ki̍p-sî lâi hoán-hoé.
Kéng Sian-seⁿ tú-á khí-sin, hit ê gín- ná suî-sî cháu khì kā i ê lāu-bó kóng, Thâu-tú-á hit ê chheⁿ-hūn lâng kā lán thó-chuí chia̍h, kàu beh chhut-khì ê sî i kóng, lán chit lāi-bīn ū pó. Hit ê hū- jîn-lâng thiaⁿ-kìⁿ sim chi̍t-sî hoaⁿ-hí kàu bē kò͘-tit, i chiū tāi-seng tuì tī chhián- hiān ê só͘-chāi lâi péng, nā-sī péng lóng bô chiū khoàⁿ-kìⁿ kè-á-téng ū chē-chē pún chheh, chiū ta̍k pún poaⁿ lo̍h-lâi ia̍h khoàⁿ ū nge̍h choá-phiò tī hit lāi- bīn á-bô? Kàu lō͘-boé pún chiū jīn-kìⁿ i chá-chêng siông-siông káng-kiù hit pún, chiū hian-khui siông-sè khoàⁿ lâi tha̍k, "Siōng-tè sī kng-kng bô chi̍t-tiám-á o͘-àm, chit ê sī goán tuì Chú só͘ siū ê tō-lí, lâi thoân hō͘ lín. Lán kóng ēng sim kau-poê Siōng-tè, lâi kiâⁿ tī o͘-àm sī lām-sám, bô sêng-si̍t, Siōng-tè khiā-khí tī kng-bêng, lán nā kiâⁿ tī kng-bêng, chiū sim kap Siōng-tè kau-poê, Siōng-tè ê Kiáⁿ Iâ-so͘ Ki-tok ê hoeh sé-tû lóng- chóng ê choē". I. Hān. 1:5-7.
Hit ê hū-jîn-lâng tha̍k liáu kám-kek m̄ o̍h i ê sim-koaⁿ, chiū siūⁿ khí i chá- chêng ū chiū-kīn tī Ko͘-niû ê kha-tau, chē chē lâng o-ló͘ i-ê sēng-tek, koh in- khîn káng-kiù Siōng-tè ê Sèng-keng, só͘ kiâⁿ só͘ chò, bô chi̍t hāng thang hō͘ lâng hiâm, bô gî-gō͘ chit-sî ē lâi pàng-sak goá ê Kiù-chú Iâ-so͘ Ki-tok. Koh thó͘- khuì kóng, Kin-ná-ji̍t lâi kàu tī goá ê ke-lāi sī pêng-siông ê koè-lō͘ lâng, tek-khak sī Siōng-tè só͘ chhe ê lô͘-po̍k. Siūⁿ-liáu sim bē bián-tit ū ut-chut ê kan-khó͘, chiū ē kì-tit chá-chêng Kiù-chú Iâ-so͘ ū chi̍t kù oē teh kóng, "Chhut-goā chiū hō͘ i toà, thǹg-pak-theh tio̍h hō͘ i chhēng, ià-siān chiū tio̍h hó khoán-thāi i gū-tio̍h iau chhuì-ta tio̍h hō͘ i lim-chia̍h". Taⁿ chit-sî bô lâi chih-chiap i, chiū tì-kàu ū ai-siong lâu ba̍k-sái. Tuì tha̍k sèng-chheh liáu chhì-chha̍k tio̍h i ê sim, chai i pún-sin sī lâ-sâm ê lâng, chiū kín- kín poaⁿ-chhut i-ê ke-si àng-tāng, ēng chuí sé chheng-khì, lāi-bīn í-ki̍p thô͘-kha iah-sī án-ni, koh i pún-sin kap sè-kiáⁿ lóng pìⁿ-chò chheng-liâm pe̍k-iāu ê lâng, chhin-chhiūⁿ tī ē-té si--ni̍h ū kóng: --
Iâ-so͘ kiò chhéⁿ choē-ok jîn, Tû-khì kū-sèng oāⁿ chò sin, Hian khui Sèng-chheh lâi káng-kiù, Chhì-chha̍k goá sim toā iu-chhiû. Chú taⁿ hō͘ goá sim chheng-khì, Ē tit chiū-kīn I sin-piⁿ, Hō͘ lâng ē chai thang hoán-hoé, Sìn-khò Kiù-chú sià tāng choē.
I ê tiōng-hu tī goā-bīn, beh chìn-ji̍p lāi bīn, hut-jiân-kan khoàⁿ-kìⁿ in ê lāi- bīn chin chheng-khì-siùⁿ, koh khoàⁿ-kìⁿ i ê hū-jîn-lâng ū chhiò-iông ê bīn-māu. I ê tiōng-hu tī chá-chêng sui-jiân gâu khêng-pek tō-lí, nā-sī i ê hū-jîn-lâng soà tì-kàu sit-lo̍h i ê phín-hēng, koh-chài lâi heng-khí i, hō͘ i ê tiōng-hu khoàⁿ-liáu bē-bián tit siū kám-ke̍k, soà hoaⁿ-hí thiaⁿ-siū hū-jîn-lâng ê khó͘-khǹg, lâi saⁿ-kap sìn Chú Iâ-so͘ Ki-tok.
(T.O.G.)
