無人倫
1909.06 291卷 p.46-47
(接第41面)
論公媽ê事咱猶原著會曉得thang分別真假。拜上帝ê人真tuì重父母公媽；第5條戒講：「著敬你ê父母」。
M̄-kú無的確著用神主來敬咱ê序大人。較早是用屍主，就是人死了就「到獻祭ê時有用伊ê大孫裝做祖宗ê屍像正正teh坐，hō͘同族ê人排祭物獻祭跪拜，表明孝敬ê意思」。 Hit-tia̍p iáu-boē有用木主。照人流傳是丁蘭設木主。丁蘭是真不孝ê子逼死伊ê老母。咱若學吳猛飼蚊，抑是學孟宗哭竹是較好。論hiah-ê扁枋仔是一尺懸nā-tiāⁿ，咱ê公媽tiàm hia thái會落？Koh咱著想，咱ê 父母若死，咱7日久一日孝2 頓；過去初一、十五nā-tiāⁿ；對年以後孝年節，正免忌。 咱逐日食三頓；亦咱ê 公媽一年ê中間食無 幾頓。伊亦無來食；伊若來 食咱就m̄敢孝。其實是咱 beh孝家己ê腹肚nā-tiāⁿ，攏無 teh想咱ê公媽ài食甚mih貨，kan-ta teh想咱家治ài食 甚mih。到做忌ê日到，咱著 煩惱想講。今我ê序大人扑損去，今仔日無thang相見。可惜人無想這個意思；有時囡仔若哮，老母kā伊講：「嬰仔恬恬，咱koh兩三日beh做忌 thang食」。
實在神無thang來食；若已經到陰間就無thang koh來。亦雖然來，神猶原無ài食。有時人講，我知影；不過是ài孝一點心，過心孝nā-tiāⁿ。實在若beh定án-ni，就有別物ê法度；咱thang翕一個像，抑是抄一個族譜來紀念。上帝一要緊是咱在生著順伊；亦死後著照伊ê教示。俗語講：-- 「在生食一粒豆，較好死了食一個豬頭」；亦「在生無thang祭喉，死了祭棺柴頭」。
父母雖罔死了後，猶原 thang顧伊ê名聲；父母所有ê好 款咱著加添伊ê好款；父母所m̄-ài ê歹咱著koh 較m̄-ài。
iáu-kú道理無叫人著破公媽，亦無叫人著雄雄去破木主。做你chhāi,亦來聽道理；聽到明就會 thang想看猶原著chhāi抑 m̄免。 |
