首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 人ê性命無久長
人ê性命無久長
卷期：第292卷 本次： 日期：1909/7 刊名：台南府城教會報 頁數：56
篇名：人ê性命無久長 [ Lâng ê Sèⁿ-miā bô kú-tn̂g ]
作者：
  顯示 : 漢羅 全羅 並列  

人ê性命無久長
1909.07 292卷 p.56-59
咱tiàm地面是出外代。世間hō͘咱徛起是無久長，上久7、80年nā-tiāⁿ。囡仔卻看是真久；老人看是一目ni̍h仔nā-tiāⁿ。
咱若問老人伊囡仔所做伊想倒轉會記tit bē;伊就beh講：「亦是bē記tit！看是親像昨昏ê事nā-tiāⁿ」。Tú chiah tī塗腳teh pê,liâm-piⁿ大漢，koh無偌久發嘴鬚，koh無偌久離開世間。昨昏出世，今仔日大漢，明仔日老，後日轉--去。人生如夢。人ê性命那夢見。作穡做生理親像眠夢中ê事；歡喜那準夢見ê歡喜，liâm-piⁿ過。
性命那親像鳥仔teh飛，那飛那懸，liâm-piⁿ看，liâm-piⁿ看無；那親像溪水，有流落，無流起；那親像k布iⁿê梭，cho̍h來cho̍h去，到hit匹布織好就師父beh kā伊割斷；那親像幾若十ham ê甘蔗，一ham過一ham食露水，今m̄知到幾ham著好折。
第一長命ê猶原到尾著去chhoē in媽睏。伊講：「我ê工做滿，beh轉--來去」。咱留伊bē tiâu。
所以要緊著想，咱死後beh tiàm甚mih所在？死後若看活在生ê苦冊較無相干；死後若勞碌命世間食好飯配好菜有甚mih利益？
世間那親像客店，較隘是暫時久，較闊較爽亦是暫時nā-tiāⁿ。你食到hóng-hóng,穿到綢綢軟軟，你厝內有交椅漆桌，奴才查某kán,che若夢見ê歡喜nā-tiāⁿ，「生不帶來，死不帶去」。咱厝m̄是咱ê,是hō͘咱借toà。身軀亦m̄是咱ê;是那土厝，起風颱落大雨，就倒--落-去。Tú著小可病咱ê身軀亦歹--去，肉爛去，骨頭灰無--去。
你較散hiong，m̄免煩惱過頭。客店較隘，眠床生目蝨、蝨母，m̄成食，m̄成睏；iáu-kú明仔再、後日你beh到厝，著罔吞忍。
較常人m̄ ài講：「死」。是講返去、轉去。今beh返去tó落？Beh轉去tó位？
有ê講beh歸陰間，beh落地獄，beh chhoē閻君。陰間是烏暗絕域ê所在。地獄是若監牢，閻君若親像官府。咱kap伊算帳驚了bē直。咱kap伊計較，向望伊會寬量咱，驚了咱bē贏。
有ê teh 向望beh請師公來破地獄，伊beh破地獄tuì閻君bē tit過。譬論親像人關監，咱叫一個師公來破監牢，看會開bē?穩當搶bē出來。有ê 向望用金紙來買伊ê命；kiám會買tit？設使人關監已經有罪，用錢來買伊ê命打算會買tit bē?打算穩當bē買tit。閻君beh thài會買爵--tit。實在攏m̄免到陰間較買，驚了已經到hia bē tit thang買出來。生一擺，死一擺nā- tiāⁿ。有去路無來路。死後ê福氣是久長，死後ê艱苦亦是久長。
今人攏beh轉去陰間是甚mih因端？咱kám是陰間出世。講beh轉去館仔內，beh轉去警察衙。咱無tuì hia來，thài著tuì hia去？咱是天生咱；天是咱兜，天是祖家。M̄-kú子若不孝，或是患著國法，伊就m̄敢返厝。亦咱不孝咱ê大老父，患天法ê罪，咱就m̄敢向望到天堂。所以講，Beh歸陰府，beh暗--teh，是那親像家己認罪；俗語講：「囡仔mi土豆隨人認份。」
iáu-kú m̄免失志。咱有罪，上帝有恩。伊是好生ê上帝，不忍其心m̄甘滅無咱。連歹人都有時想ài beh做好事，賑濟散hiong人，喜捨歡樂，莫kioh上帝koh較ài行好事。伊滿腹是度量，滿心是仁愛，所以無惜伊獨生ê子差伊來世間贖咱罪卦，開路hō͘咱會好轉來天堂。有ê teh問，天堂你bat行到--無？He iáu-boē。無的確著到所在才會知hit所在ê境況。親像咱雖然m̄-bat到日本，iáu-kú若見著日本人，kap伊講話，聽伊ê消息，是若親像咱本身已經到日本。天國亦是án-ni。耶穌tuì hia來，報咱知天堂ê大福氣講：「我父ê厝有濟濟ê厝宅」。咱聽了kám著giâu疑？有ê講，天無khám,無樓梯thang爬tuì hia去。
耶穌做咱ê樓梯。有耶穌有路。伊本身講，我就是路。咱若beh過唐山咱泅，泅betit7過。坐船靠船主就會到hia。耶穌親像渡船beh渡咱過天堂。咱那親像tiàm tī海面，beh沈--落去。耶穌那親像救命船駛倚來，咱著khîⁿ hit隻船。罪惡四面kā咱淹，四面kā咱激。伊一條索hiat落去hō͘咱khi̍p。M̄是伊m̄救咱，是咱m̄ hō͘伊救。
ài beh到天堂穩當著靠耶穌。咱家己beh走出罪惡無力，家己beh行好無thang行到盡頭。
是若親像肉豆tiàm tī塗腳teh noà。著插一支竹來引，伊就會旋上坪。著án-ni來靠耶穌就會到天堂。
信靠耶穌就m̄免驚死。長歲壽亦好，夭壽亦好，早死早好。逐個講，死歹代。耶穌ê學生講，死好代，死比活koh較好。「死--ah！你ê德性tī tó落？」「感謝上帝，伊hō͘咱tuì主耶穌基督來得勝」。
有時耶穌ê百姓，beh臨終ê時陣，心就歡喜到無話thang講。無幾年前tī台南府城老鼠症kài厲害；照人teh講，萬外人死。內中有拜上帝ê人染著。有一個醫生較少年；beh臨終ê時kā某子講：「今lín攏m̄免替我煩惱，我beh返去天堂。」 伊就搭手掌koh講：「我beh天堂；耶穌來，耶穌來；我beh返去天堂」。
今著及時來hō͘耶穌救。有ê推辭講，我較老，beh是我較少年，我就beh來趁。老俗--ah，iáu-boē慢！你ê福氣較近。今著來行天路，tuì死路著m̄-thang去。有ê講，我較少年，較慢會做tit；聽候 較閒，聽候我hit層事辦清楚，聽候較濟人來拜上帝我就來拜。án-ni七延chhiân八延chhiân,真風險。你kám會hō͘你ān--tit ？上帝beh hō͘咱破病kiám會thang講，我無閒thang破病；或是咱ê生命伊beh kā咱討轉去，kám會hō͘咱ān--tit較慢？著poah工來聽；別物事咱著放一邊來得著救。是關係死後久久長長ê代誌。這-tia̍p是咱ê時？明仔再咱m̄知。
早前tī英國ê北爿有大隻船洩漏teh beh沈落去。救命船仔倚來。船主講：「我beh提我ê銀chiah來。人勸伊著m̄ thang。」伊去bâ-lî 提；到倒轉來已經siūⁿ慢。大船沈--落-去；船主續擊死。後來伊ê身屍hō͘人拾著；看tī伊ê銀袋仔內只有一箍銀nā-tiāⁿ。伊beh救伊一箍銀，續扑m̄見伊一條姓命。
人beh笑伊ê憨亦bē曉家己笑。得著錢財到滿天下亦扑m̄見咱一條神魂有甚mih利益？無講為著世間小可ê代誌罔延chhiân,罔延chhiân。
咱ê生命m̄知到甚mih時。有時食飯，食bē暗。有時朋友天光早kap咱交陪，e昏死。
英國有一個尊貴ê婦人人，道理攏知影，不過心iáu boē降服tī耶穌。Tú著伊teh想講，今明年我著來hō͘耶穌救。伊就提筆紙來寫講：「到明年我beh得著救。」 寫了就koh想講：「明年m̄知iáu有生命抑--無，káⁿ著m̄ thang chhiân 到hiah久」，就koh再寫講，「後--月我beh hō͘耶穌救。」Hioh一個就koh想講：「後--月ê事亦是oh-tit打算；káⁿ著後禮拜較穩當」，就成做講：「M̄知上帝beh hō͘我有生命到後禮拜抑--無？」路尾就寫講：「明仔再我beh反悔來信靠救主。」
明仔早起有人來叫伊，叫無應；扑門，猶原tiām-tiām;門sak開就看見hit 個婦人人倒tī眠床已經死。伊beh候到明仔再；m̄-kú明仔再以經siūⁿ慢。囡仔亦著來hō͘耶穌救。有時人講，囡仔bē曉tit。He無的確。囡仔一條靈魂bē較細大人ê。囡仔猶原會thang落地獄上天堂。早時某甚mih國有一個太子kap先生teh讀冊。伊kā先生講：「這個道理你著教我bat。」先生就應講：「iáu-boē;聽候你較大漢我就beh教示你」。囡仔就應：「先生我前日去墓仔埔來量hiah ê墓；有ê比我koh較短；所以著緊緊教我。
今大家著趁這時來得救。耶穌講天國thang比並10個在室女出去beh迎接新子婿（Che是猶太國ê風俗。早前中國ê風俗亦是án-ni）。查某囡仔ê中間5個是憨，5個是sek-ê,sek-ê 舉燈，koh另外創油便。憨ê舉燈亦無另外創油。
新子婿teh chhiân ê時陣大家加濟teh睏。總是半暝有聲叫講，新子婿來--la̍h!Lín出來接--伊。Chia ê在室女chiah攏起--來，整對in ê燈。憨--ê kā sek-ê講，將lín ê油poah寡hō͘阮，是阮ê燈beh hoa去--lah。若是sek--ê應講，驚了無夠額hō͘ lín kap阮大家用；lín較好著去家己搭。In去搭ê時新子婿到；有便--ê kap伊相kap入去赴新婚ê筵席；門就關。然後其餘ê在室女也到講：「主--ah！主--ah！Kā阮開。」若是伊m̄講，我實在kā lín講，我m̄-bat lín。
今今仔日是得救ê日。上帝hō͘咱性命iáu tī-teh，m̄知甚mih時咱赦罪ê門beh kā咱關。
(梅牧師記)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461