嚴清華Ê小傳
1909.09 294卷 p.73
清華亦名佛仔，伊tī細漢ê時有入小學讀冊，家事不止散，所以到16歲，姑不chiong著退學去hō͘人chhiàⁿ。有佮伊ê頭家相佮去廣東，無久就koh轉--來。到20歲就娶某，hit年偕牧師抵到淡水，伊就去探伊愛討看有頭路抑無。偕牧師chhiàⁿ--伊，hit-tia̍p伊攏m̄ 知聖教ê道理是甚物款。後來漸漸得著偕牧師ê教示，就反悔改變來信主，而且洗禮入教會。án-ni算是北部第一個入教--ê。
後來偕牧師接納伊做學生教示道理，無久就去做傳道，有tiàm 幾若位ê拜堂。到26歲ê時合偕牧師四界設教；到31歲就鬥教大學，做大學ê先生；到34歲有升做牧師；對hit-tia̍p了後攏是tiàm tī淡水幫贊偕牧師料理教會ê事務；到50歲致病，對hit-tia̍p了後身體較lám ，做工較少，淡薄鬥教大學合巡視教會nā-tiāⁿ。
Tī今年5五月間合劉牧師去巡宜蘭ê教會，倒轉來無幾日病勢較傷重，有chò-lī佮phuì 血，宋醫生不止盡力teh kā 醫治，總是無法--tit。到6月2號過往，今年抵58歲，信主有38年久，做牧師24年。
伊一生常常佮官交陪，官場ê事伊不止知影。Tī 18歲ê時bat運糧去北京，有得著賞五品軍功合即補縣丞；tī 33歲ê時台灣ê巡撫kā 伊保奏chīn sian 守備兼守南陵；亦tī 43歲ê時，唐撫台有kā 伊保奏候選知縣。
到45歲ê時日本ê政府有賜伊紳章，亦46歲做台北廳ê參事，Î-sin公會ê教士，仁濟院ê委員，kap華民會館ê教士。對án-ni來看，伊m̄-nā辦理教會ê事務，以外iáu有盡力鬥辦別項ê事誌。 |
