土耳其ê譬喻1909.09 294卷 p.73土耳其國有一個譬諭teh講隨人左右爿有兩個天使teh跟隨。看人若做好事，tī正手爿hit-ê就將hit層事kā伊記落簿續tǹg印仔，是因為伊所做ê好代永遠bē廢--無-tit。遇著伊做歹事，tī左手爿hit-ê也kā伊記落簿。等到半暝看hit ê人若àⁿ頭祈禱講：「施恩ê上帝ah！我有得罪求赦免我」，若聽án-ni，天使就用海絨tuì簿ni̍h拭起來。設使過半暝若無認罪，左爿ê天使猶原kā伊蓋印，當hit-tia̍p tī正手爿ê天使就替伊流目屎。「天使kiám m̄是攏做差用ê神奉差，因為得著救ê人ê利益來服事上帝。」（希。1:14）。
Thó͘-ní-kî ê Phí-jū1909.09 294 koàn p.73Thó͘-ní-kî kok ū chi̍t ê phì-jū teh kóng suî lâng chó-iū pêng ū nn̄g ê thiⁿ-sài teh kin-suî. Khoàⁿ lâng nā chò hó sū, tī chiàⁿ chhiú pêng hit-ê chiū chiong hit chân sū kā i kì lo̍h phō͘ soà tǹg ìn, sī in-uī i só͘ chò ê hó-tāi éng- oán bē hoè-bô-tit. Gū-tio̍h i chò pháiⁿ sū, tī tò-chhiú pêng hit-ê iā kā i kì-lo̍h phō͘. Tán kàu poàⁿ-mê khoàⁿ hit ê lâng nā àⁿ thâu kî-tó kóng, "Si-in ê Siōng-tè ah! Goá ū tek-choē kiû sià-bián goá, nā thiaⁿ án-ni, thiⁿ-sài chiū ēng hái-jiông tuì phō͘-ni̍h chhit khí-lâi. Siat-sú koè poàⁿ-mê nā bô jīn choē, chó-pêng ê thiⁿ-sài iû-goân kā i khàm-ìn, tng hit-tia̍p tī chiàⁿ chhiú pêng ê thiⁿ-sài chiū thè i lâu ba̍k-sái. "Thiⁿ-sài kiám m̄ sī lóng chò chhe- ēng ê Sîn hōng-chhe, in-uī tit-tio̍h kiù ê lâng ê lī-ek lâi ho̍k-sāi Siōng-tè." (Hi. 1:14).
