首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 聖冊公會ê報告
聖冊公會ê報告
卷期：第294卷 本次： 日期：1909/9 刊名：台南府城教會報 頁數：76
篇名：聖冊公會ê報告 [ Sèng-chheh Kong-hoē ê Pò͘-kò ]
作者：高金聲 Ko Kim-seng
  顯示 : 漢羅 全羅 並列  

聖冊公會Ê報告
1909.09 294卷 p.76-78
百姓teh相通，若無路就bē用tit。總是路有古今ê分別。古早--ê無合這tia̍p;現在世界大相通，百姓興旺ê時陣，著講究較利便ê法度，hō͘長ê路會勼短，若無設鐵路就bē會。若是這字「路」--字逐國攏有幾若ê意思，有直用--ê,有借用--ê;親像人teh走ê路，車馬teh行ê路，以及活命ê路，逐國ê聖賢雖有指示人知著入好ê地步，若是家己iáu m̄知正路。In教人ê道理，是親像路--ni̍h ê腳跡，只有會chhoā人到庄社，bē會chhoā人行tī kap上帝相通ê路。
今有一人kap眾人無相同，m̄ 若伊所講贏過平常人，就伊ê智慧，也無人kap伊會比tit。這人就是耶穌基督上帝ê子。伊深知世間人行迷路，所以tī 2000年前降生tī猶太國，ài報人知活命ê路。本身有講：我是路，是真理，是活命。
Beh詳細知耶穌ê代誌，著tuì聖冊；人若讀，無各樣親目看伊。án-ni聖冊實在是人人所應該著有ê要緊冊。大英聖冊公會知án-ni，chiah tī100年前設立公會，翻譯聖冊，hō͘天下ê人thang公家得著利益。
查考所翻譯ê聖冊，零星本已經有412等ê腔。Tī中國有翻譯做文理、官話、廣東話、客話、汕頭話、廈門話、福州話、寧波話。M̄若tī中國有翻譯幾若腔，就是印度、阿非利加、南阿米利加以及歐羅巴也是án ni。要緊beh hō͘天下ê百姓會照in家己ê土音看聖冊，來得著活命ê路。
聖冊公會，除翻譯舊約39本，新約27本以外，著koh印來發去逐國。Tī 中國逐省teh分賣聖冊kap講聖冊ê人有400，所賣ê冊價不止便宜。除總發行所發出--ê,kap逐所在學校ê學生，以及病院內ê人，監內ê犯人應用以外，有賣聖冊125萬本較加。20年前，中國人若看著聖冊，白白送伊也m̄ ài收；今大cheng-choa̍h ；買去讀ê,有講百萬人。
有人問講，見若看這號冊ê人，kiám家己會chhoē著活路？應講：冊內雖然有濟濟位難明ê道理，iáu-kú耶穌ê道理人若讀，無論gâu-ê、憨ê攏會曉tit。今將幾若人讀聖冊續chhoē著正路ê因由記tī下底。
Tī呂宋今年春天ê時，有幫贊翻譯聖經ê本地人講伊來趁道理，是tuì讀聖冊。伊看約翰福音傳4:24講：「上帝是神，拜伊ê人著用神用誠實，tuì aⁿí 才醒悟拜佛ê m̄著，漸漸進步tī正道。」當伊受感化ê起頭，伊ê父kap伊講話。伊就將聖冊一人一本hō͘ in，kah in著讀；後來伊ê父kap伊ê兄也續反悔來入教。
緬甸ê京城有一個尼姑，得著一本聖冊，看親像寶貝，因為伊hit內面ê道理thang tuì重。臨終ê時伊數念聖冊ê話，心內不止得意。Beh死ê時就將hit本冊送伊ê朋友。Hit ê人有去讀，續來拜上帝。伊看聖經ê意思不止新奇，所以常常去厝邊傳得救ê道理，舊年續tú著hō͘人扑。後來本會賣冊ê人看伊tī病院teh調養；病好，就chhoā伊來教會內，教示伊正道來接納伊。
英國一個當兵ê印度人名Tàn-nî-lân,幾若年前tī大奇嶺ê地方，得著一本聖冊，tuì重伊親像聖ê府庫。因為伊講，冊內ê話是親像電氣ê力hiah燒，會計換人ê念頭，koh thang做沈淪tī罪惡中ê人ê好救藥。後來這人kap伊ê朋友攏是讀這本聖冊，tī緬甸Bo̍k-bí-hā ê教會入教。
本會賣聖冊ê人bat tī法國羅尼山谷內ê客店hiah睏，teh食飯ê時，有店內ê婦人人kap伊teh談論幾若年前賣冊hō͘伊ê事。講伊kap in丈夫因為讀聖冊才知得救ê道理，獨獨著信耶穌，以外無別物法度。總是in翁某讀到半路，hit陣iáu-boē信這條淺現ê道理，心內不止煩惱，就放hiat-ka̍k m̄讀，向望這層事會bē記tit，若是兩人攏定定記tit。Tuì án-ni，tī某ê-hng in丈夫聽見那準有聲teh kā伊講，你著去提冊來讀，就你ê靈魂會得平安。In丈夫就提聖冊來讀，忽然心得平安。所以tuì hit tia̍p到今，in兩人心內chám然快樂。
山東ê婦人人攏是tuì重拜佛，若迎神賽會，或是落旗ê日，婦人人聚集tī這所在m̄若兩三千。Beh去ê時，有ê bat聖冊，in丈夫提去看，後來續變做信徒。Hiah ê婦人人買冊，原意是beh做挾ê冊。這tia̍p hia有一庄幾若人來信主，是tuì讀著in ê婦人人所買ê約翰福音傳。
Thoat國修律院ê委員，皮將軍，tī Kian-la̍p-si-pó開聖冊會，演說ê時，tuì胸前提一本歹歹koh舊ê聖冊出來。就講：「這本冊tī交戰ê時，也toà tī身軀--ni̍h,e昏時有做枕頭。有一擺生命會活是靠這本，因為交戰ê時，有兩粒銃子直直扑著胸坎，佳哉擋著這本冊ê銅角頂，噴走去；若無，我ê命無去lah ! 」聽見講，這本冊是in老母hō͘伊，伊看做親像無價寶。
印度ê傳道有講起Bo̍k-tek-bí-lâi-an-bûn廟ê和尚入教。這間廟是tī Kó͘-lân-kài-nî ê地方，印度南方講千講萬ê人去hia敬拜。這個和尚tī 1903年去ài-jî-hū-toê禮拜堂看著人拜上帝ê法度，不止受感動，常常記心。返去ê時kap到廟hit-tia̍p伊比看見ê時陣，koh較受感動，hit時就買聖冊去讀。到我去hia傳道，伊出來應答m̄信耶穌ê人ê問題。我越頭來問伊，伊應講：伊是耶穌ê囡仔，就ài beh受洗禮來入聖教。舊年12月印度ê監督問道理ê時，這個人已經排列tī欣慕道理ê人ê中間。
台州魯牧師講上帝ê道理活活動動ê證據記tī下底：--
我起頭看著蔣飛標是tī 1870年，hit-tia̍p伊ê腳hō͘滾水燙著，in老父āiⁿ 伊來我chia beh醫治。若是我雖然無學習醫法，卻有將糖攪雪文做膏藥來糊，糊了就好，若是這人幾若年久無koh看著。
Chia建置印冊房了後，in老父請我著倩伊來印冊。伊不止無歡喜這號工，koh kap福音做對敵，所以幾若月日ê中間，逐早起阮teh祈禱ê時伊真怨恨。若是阮一發替伊祈禱，向望伊得著聖神ê感化。無偌久這人心性就換新，因為伊teh拾台州土音新約ê印版，所以快受感化。Hit tia̍p了後，凡做祈禱會伊比別人較敬虔；逐安息日來禮拜，chám然有去舊換新ê款。Tī 1880年有領洗禮，伊kā我講伊ê心受感動，是tuì拾新約ê字。Tiàm冊房做工幾若年，也真心學道理，然後派伊去別位傳道。Tuì hit-tia̍p到今iáu合伊ê職份，雖然無gâu講論，若是伊ê行做較贏伊ê口才。兩年前hō͘人舉伊做台州內地會頭日ê牧師。所以翻譯印台州ê聖冊，m̄ 若hō͘濟濟人會讀上帝ê道理，koh tuì án-ni加得著一個牧師。這人今做這所在ê大幫手，真著感謝上帝。
Tī南亞美利加近巴西ê地方，有細陣ê教徒一陣，不止樸實。8年前賣冊ê人tuì hia過，有賣真濟冊。人買去讀來講究，就有幾若人聚集tī一所在來查考這號冊，看伊比別物冊較贏。總是所講ê道理m̄知是屬甚mih教，是德國教，英國教或是美國教，無tè thang分別。若是這款ê冊的確m̄是羅馬教，因為in看著冊內有毀謗羅馬教ê風俗，就是in看著約翰行洗禮無提人ê錢。上帝所賞賜無thang買ê道理，in深深奇怪。這教也的確m̄是耶穌教，因為in ê神父bat講，耶穌教m̄信上帝kap基督，m̄-kú這冊內滿滿記在上帝ê代誌。後來in看見一個耶穌教ê傳道去hia，in真gông-ngia̍h ，因為hit ê傳道所信--ekapîn所守ê教是相同。
(高金聲記)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461