粟鳥仔
1897.09 150卷 p.71-72
早日孔子看見一個用網仔teh tng粟鳥仔 ê 人，所掠--著攏是細隻ê 粟鳥仔。孔子就問伊講：「Thài 無掠著大隻ê 粟鳥--leh？」Tng鳥 ê 人應講：「大隻粟鳥會曉知thang驚，oh得掠--著；細隻粟鳥仔貪食快快入網內，所以攏是掠著細隻--ê。總--是細隻粟鳥仔若toè大隻--ê,就網bē著；因為會toè 大隻--ê 飛走。大隻粟鳥若 toè細隻粟鳥來食餌，就大細隻攏網會著。」
孔子聽了，就越頭kā 伊ê 學生講：「會知驚惶--ê,thang閃避陷害；貪著食--ê,m̄知叫災厄即時到。獨獨所趁有分災禍佮福氣；所以君子ê 人謹慎 tī 所趁；趁老練有智識 ê 人，thang保全身軀；趁細子ê 憨，致到滅無。」
今看這層ê 故事，正親像俗語所講：「鳥為食亡，人為財死。」敢 m̄是thang做警戒--mah？
咱ê 救主有指示講：「著謹慎、著祈禱，免得入迷惑。」
現時台灣屬tī 日本；bē免有濟濟人去hō͘ in倩做工、食 in 衙門 ê 頭路。
咱台南教會內也有濟濟少年人去學日本話，去趁 in ê 食，卻是較好趁錢。M̄-kú 著真細膩。因為有人致到安息日bē全守；就道理那無要緊，心肝直直冷淡。
論去學日本話卻無m̄好，因為若m̄-bat in ê話，bē-thang相通真費氣，若有抵好機會 bat 淡薄是好。若kan-ta為著好趁錢煞放sak真理，失落神魂；是若箴言所講：「鳥入籮網，到刀teh剖腹肚，就知生命無--lah」。（箴言7：23） |
