隱匿發覺
1910.01 298卷 p.10
舊年6 月市內三界壇總督上情有掘著金條。Hit時因為hiah-ê 做工--ê 有分4線，早有查出 21 條nā-tiāⁿ。近日有koh 發覺6 條，kap前 hit 21 條，計共值金13500 箍。今將所查出 ê事由記tī 下底：--
近日有巡查捕聽見人teh 會寄金條tī 朋友ê 厝有不平 ê 事，就去報告警務課。有一個人來toà tī 三界壇米店--ni̍h,聽見人掘著金條，伊也去搶 7 條，寄4 條tī 伊ê 朋友兜，也另外將一條hō͘ 伊做謝禮。這個朋友是澎湖人，然後轉去澎湖。
警務課有派人去澎湖查出紲召hit個人來問講，前某人寄你4條金條有tī-teh 無﹖伊應講，4塊有還伊，不過伊有將1塊hō͘ 我做謝禮。伊就提hit 條出來hiàn。Sio̍k-jî-hō͘就去寄伊hit人ê 厝查問。Hit人是toà tī Siau-lâng pó,大潭庄。證已經有來hiàn 兩條。警務課有去叫hit 個澎湖人來對指，總--是伊m̄認講，所寄ê 有還伊，硬硬無。M̄-kú 警部信hit個澎湖人還伊了ê 話是實。
後--來別個警部kap一個巡查捕去Siau-lâng-pó hit個人in兜暗查。伊有假做本島人。In 去就kap伊話東話西，續講tuì 金條ê 事去。Hit個人m̄ 知伊是警部beh來暗訪就kap伊nauh-nauh 講，續漏口講伊有囥金條2 條。警部就kā伊講：「我是大人，你著kā 我講看囥tī tó位 。」伊應講：「Tī 厝內ni̍h。」 Tī 本月8日就差人去掘，掘攏無，知伊白賊。後--來有叫伊去嚴嚴訓喻，伊就講，是囥tī 伊厝內ê 竹thiāu內﹔去chhoē果然有2 條tī-hia。警部看伊ê 行跡，扑算iáu有，就koh細查。近日有得著伊2 條去寄tī 朋友ê 厝。Che是tuì 伊有查出這4 條。
又koh 市內有1 個婦人人。得著1 條去寄tī Chò-bi̍h-ke人兜。近日也有發覺。án-ne計共有 6 條，kap前是計共27 條。每條有9 兩8 錢重。是親像香爐ê 款。 |
