奇怪ê應答
1897.09 150卷 p.72
較早有一個信主ê人，伊是做隱居ê讀冊人，攏無ài插俗事。Tú--著某日一個人客來探--伊。Hit ê人客就問伊講：「你是拜上帝ê人ho͘hN？」應講：「正是。」人客就koh講：「照lín拜上帝ê人teh講天地間只有一個上帝逐所在tī teh。若是我攏 m̄ bat 看著上帝，chiah m̄ ài信；請你chhoā我去看就beh信--lah。」
Hit ê信主ê人靜靜無應。停一下就àⁿ落土腳拾一個土丸，tuì hit ê人客ê頭殼出大力就kā伊tìm--落--去。Hit ê人客hō͘伊tìm著痛，就大生氣，tuì官府去告。
官府就即時去調hit ê信主ê讀冊人來問伊講：「伊請教，你既然 m̄ 應--伊，就啥事反轉用土丸tìm--伊，he有甚麼情理ah?」Hit tia̍p hit ê信主ê讀冊人，慨然慨然tuì官府ê面前應講：「我用土丸tìm伊ê頭殼，就是teh應答伊所問。論頭殼tìm--著會痛，這號是人人所信，所知ê情理；m̄ kú無人bat看--著hit ê痛生做àn 怎樣。也攏無一人敢講，痛無看見無影有痛。àn-ni上帝是神，無形無像，永靈聖體，無所不在。Tuì古早以來無人bat看--著。若是tuì上帝所創造ê天地萬物，thang 知有一個上帝。這是自然ê理氣 ，無thang辯駁。的確m̄ thang因為目珠無看見，煞m̄信，就極大差謬。
官府聽了奇怪伊所應答，掠伊ê話是對。人客見笑就去。 |
