首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 罪ê氣力
罪ê氣力
卷期：第299卷 本次： 日期：1910/2 刊名：台南府城教會報 頁數：15
篇名：罪ê氣力 [ Choē ê Kuì-la̍t ]
作者：
  顯示 : 漢羅 全羅 並列  

罪ê氣力
1910.02 299卷 p.15-18
(梅牧師記--ê)。
比並羅馬 5：20 ：「今律法nǹg--入來，hō͘ hit個行錯會加添較濟。若是罪過所加添 ê所在tī-hia 恩典有滿--出來到有chhun。」罪 ê 氣力尚第一大。抑是咱若講歹ê 氣力極大意思會較明。逐人bat 想ài做好m̄-kú 逐人bat hō͘ 歹較贏。有時人真ài脫離歹，iáu-kú 脫bē 離。
俗語講：「學歹3日，學好3年。」亦講：「做好親像龜teh peh壁﹔做歹親像崩山」。咱ài 做好ê 時，ài 進前tī 好路﹔歹就掠咱，giú 咱，kā 咱拖倒轉。譬論來講，人想m̄ ài食鴉片較好﹔較停仔鴉片鬼來giú伊，強強押伊去到鴉片薰間。抑是人想poa̍h-kiáu m̄ 好，就咒choā m̄ poa̍h﹔若是kiáu鬼m̄ 放伊煞，m̄免幾日就看hit個人猶原teh me 牌仔。抑是人想m̄ ài ta̍uh-ta̍uh kap 人嚷使性﹔較停仔kap 人聚會，為著一半句話吞忍bē tiâu,就kap 伊賭猛。
Tuì áu-ni 就講歹ê 氣力上大。咱若略仔比並，就較知影。比論銀ê 力chám然猛，若是bē 比--tit 歹 ê力koh 較猛。銀ê 力真大。金銀拖人去到天邊海角。親像beh 掘金有時著去到極熱 ê 所在﹔人亦甘願去無嫌艱苦。Tī káⁿ-ná-thaⁿ ê 西北爿有一所在真闊，亦無出五穀，亦無發草，花草樹木攏無，亦無甚mih光景thang看﹔三月日久日攏無落山，蚊真kāu,暝--時睏m̄ 成眠﹔三月日久攏無出日是thong-thong 暝--時，koh 真寒到極，落雪落霜，土tēng khok-khok 親像鐵一樣，塗面不時有雪tī--teh 。
甚mih人toà hia toà 會tiâu ﹖M̄-kú 這近來偶遇然有人去hia 掘--著金。
聽見hit個風聲liâm-piⁿ 有人，講千講萬，走去hia beh 尋金。ài beh 去hia﹔m̄-kú 無hiah快﹔著聽候tú好ê 時，就敢過山嶺﹔路--ni̍h 有人gân--死，有人摔--死。已經到tè,m̄-kú 無thang食，亦無thang toà﹔有ê 亦續餓死。有ê 掘無﹔有ê 掘--著金，m̄-kú 起病死﹔較無ê 人自然艱苦，較有ê 人亦艱苦，米糧真貴，做工真無閒。大家拚勢teh 趕，驚了寒天到，bē 做tit工。寒天到就m̄敢出門，三月日久暗sô-sô,m̄ 知天m̄ 知chai地，kan-ta bih tī 內底teh 食、teh 睏、teh剖柴hiâⁿ火。
金銀ê 氣力真正是大。天下逐國ê 人認伊做主hō͘ 伊管，hō͘ 伊苦楚，hō͘ 伊tioh來tioh去。總--是罪ê 力koh 較大。銀ê 力真強，會挽人離開伊ê 本所在、本國，來tiàm tī 真oh到、真艱苦toà ê 所在。親像福州人ta̍uh-ta̍uh 離開本所在，過來台灣開店，田庄ê 人亦ta̍uh-ta̍uh 離開親人朋友去鬧熱ê 街市趁錢。漳州、廈門、泉州、永春 ê人，幾若十萬，常常落船，過海，十日，半月日 ê水路，beh 去呂宋、Sit-la̍t-pho、檳榔嶼、Ka-la-pa、南洋 ê 海嶼，m̄-bat 到ê 所在。Kám是ài 出外 ﹖無的確。有時tiàm tī 船頂teh 哭。是因為ài趁錢，ài 好額。銀ê 力真大。
若是罪ê 力iáu較大。已經到tè 伊想koh 3、2年就beh 倒去唐山。今出外十數年，iáu-boē bat 倒--去。銀好趁，現趁現開﹔朋友叫伊去poa̍h-kiáu、食鴉片、去歹子間﹔無所費thang 轉--去。罪ê 力較贏銀ê 力就是án-ni。人kám無ài chhun 錢 ﹖你若問人看伊teh 煩惱甚mih？伊講煩惱銀。iáu-kú 真濟人無chhun錢，反轉是欠錢。是啥事﹖較常是因為嫖賭飲，hit號 ê 歹，劫人ê 錢。」年頭khōng-khōng算﹔年尾chhun 1 條錢券。」
有人較無要緊錢，較愛體面榮光。親像兵愛beh 得著榮光就歡喜經過濟濟ê 著磨，受風受霜，真敢死。日本兵偌濟，無tuì重別物，若會thang替國死，後--來傳好名聲hō͘ 人念，這號ê 福氣kám無夠額﹖有時囡仔苦心讀冊，抑無愛kap 囡仔伴四界sńg,是因為伊teh 向望別日會進中，看會thang做大官。
逐人愛體面。不時人teh驚會失臉面， 講：「若beh án-ni，就hō͘ 我紅面」﹔「Hō͘ 我無面thang 見--著人」。體面ê 力真正大﹔體面 ê 力bē是大，罪ê 力iáu 較大。食鴉片ê 人kám無顧好名聲﹖iáu-kú 直直食鴉片到hō͘ 人看輕、keng-thé 。poa̍h-kiáu人kám是m̄ 愛hō͘ 人o-ló ﹖Kám無愛穿衫綢綢軟軟﹖iáu-kú 有時ài poa̍h-kiáu到穿破衫，較好ê 衫去當。
五倫ê 力亦是大﹔父疼子，子敬愛父﹔疼痛ê 力真正是大。iáu-kú 咱常常看人留心teh poa̍h-kiáu、食酒、食鴉片、四界chhit-thô,亦某子放hō͘ 伊餓，去賣--人亦敢。
銀ê 力是大：銀ê 力bē 是大。體面 ê 力koh 較大。體面ê 力bē是大：疼痛ê 力iáu 較大。疼痛ê 力bē 是大：罪ê 力竟koh 較大。罪ê力既然chiah大，咱beh用甚mih法度kā 伊除--去，kā 伊壓制﹖ 較常人揀著用國法kā 伊禁，koh 著用好ê 教示勸人，伊就m̄ 敢做m̄著。
人講，做歹是tuì m̄ 知影﹔著勸善hō͘ 人知影好歹，著m̄ 著。
Kám是m̄ 知影﹖你若問囡仔，著做好抑是著做歹﹖著食鴉片抑是著m̄-thang﹖著poa̍h-kiáu抑m̄-thang﹖囡仔會kā 你講是非。人若做歹，就良心家己責備，iáu-kú罪惡beh 強強拖伊去做歹。逐個知若食鴉片，鴉片會害伊本身續害伊 ê 家內﹔雖然知，猶原khat苦著hō͘ 罪惡管。逐人知善有善報，惡有惡報﹔iáu-kú 無力thang 改惡從善。
抑是國王官府會thang用甚mih tú好ê 法度來除--去罪，嚴嚴kā 伊禁，禁會tiâu--bē ﹖亦是bē。Beh禁人ê 腳，m̄ thang 行歹路，抑是禁手m̄ thang lám-sàm用來害死人，偷提物、poa̍h-kiáu,亦是真oh tit禁﹔有時國法那嚴，刑罰那重，歹風俗亦是那盛。
俗語講：「嚴官府出kāu賊。」不止心內ê 歹，hō͘官府禁，禁攏bē tiâu,反轉那禁那發作。抑是咱本身beh kā 伊壓制，就心內ê 歹koh 較ài giâ--起來。
歹ê 力上大，hō͘ 咱本身禁bē-tiâu,hō͘ 官府，國王禁bē-tiâu,hō͘ 上帝禁bē-tiâu。
英國一個醉漢bat 講，這杯酒，若lim了liâm-piⁿ beh kā 我hiat落地獄bē hoa ê火，我猶原khat苦著。
罪ê 力真大。若是福音ê力，恩典ê 力iáu較大。甚mih福音﹖甚mih恩典﹖
是講千罪萬罪攏hō͘ 耶穌擔--去﹔是講「咱猶軟弱，tú好到時耶穌替m̄ 拜上帝ê 人 (不虔) 死」。你講：「著心堅、意切」。 M̄是講著心堅、意切﹔你ê 心志軟軟親像水，你無一點仔ê 志氣 ﹔好，做你好膽來倚耶穌﹔kā 你講耶穌替軟弱ê 人死。
你講，M̄-kú 我真歹，著chám然改--過就會thang hō͘ 耶穌救。Kā 你講耶穌替「有罪ê人」 死，替「m̄ 拜上帝 ê 人」死。拖你ê 罪來就近耶穌。「來就近耶穌beh 創甚mih貨 ﹖」你若靠伊你ê 罪攏歸tī 伊算是伊ê 數。Hit-tia̍p 伊hō͘人釘死是替你釘死tī 十字架。你若靠伊就今仔日會得赦罪，亦別日m̄ 免受刑罰。Koh 伊beh 將伊ê 好神來tiàm tī你心內，會較贏罪，hō͘ 你日日改舊換新。
「罪所加添ê 所在，tī-hia 恩典有滿出--來到有chhun。」
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461