Lêng-jio̍k chiâⁿ-chò En̂g-kng
1910.03 300 koàn p.24-25
Ū-sî lâng kóng-oē bô sím-mi̍h tú-hó, sī tuì in bô chim-chiok siūⁿ, kan-ta khoàⁿ goā-phoê, bô kiù-khàm chin-si̍t. Tì-kàu lia̍h kiàn-siàu chò êng-hián, lia̍h thé-biān chò kiàn-siàu. Chāi-chá sù-tô͘ hō͘ in ê sī-toā lâng lia̍h khì koaiⁿ-kaⁿ siū phah , in lia̍h chò êng-hián (Hēng-toān 5 :40 , 41 ) ; kiaⁿ-liáu lán nā tú-tio̍h hit hō ê tāi-chì chiū beh lia̍h chò chin làu-khuì. Tong-sî Iâ-so͘ sí tī si̍p-jī-kè, hit-tia̍p chiàu lâng khoàⁿ sī tú-tio̍h toā kiàn-siàu ke̍k lêng-jio̍k; i-ê tuì-te̍k lóng tek-sèng thé-biān tò khì in chhù. Chóng--sī kiù-si̍t ū án-ni á-bô ? Lán tio̍h chim-chiok siūⁿ chiàⁿ chai, hit chi̍t ji̍t chí-ū Iâ-so͘ ū miâ-siaⁿ thé-biān, kî-û chèng-lâng lóng kiàn-siàu lak-lián. Taⁿ lâi siūⁿ in chi̍t-lâng chi̍t-lâng ê chêng-hêng, khoàⁿ ū-iáⁿ sī án-ni á-bô.
1. Pún-tiu Pí-liap2-to. I sī Lô-má kok ê toā-koaⁿ, teh koán Iû-thài Sat- má-lī-a nn̄g séng , ū chē-chē peng sio̍k i koán-hat , peh-sèⁿ lóng tio̍h sūn-thàn i ; i ū koân thang hō͘ lâng sí , iā ū koân thang kā lâng tháu-pàng. Hit-ji̍t gí-tiāⁿ Iâ-so͘ ê sí-choē liáu-āu i tò-khì kū ông-kiong ū lô͘-po̍k lú-pī teh ho̍k-sāi i; i thang toà tī hia khoài-lo̍k, bô lâng káⁿ uî-ke̍h i. án-ni kiám m̄-sī toā miâ-siaⁿ ? Kî-si̍t tī hit ji̍t chin iú-khuì. In-uī i chai Iâ-so͘ sī bô choē ê lâng , siūⁿ beh tháu-pàng i , m̄-kú m̄-káⁿ chū-choan. I sī koaⁿ-hú, iáu-kú hō͘ peh-sèⁿ chi̍t-ē háⁿ, i chiū hâng-ho̍k in. I chin khoàⁿ-khin hiah-ê chè-si tha̍k-chheh lâng, iáu-kú hō͘ in ah lo̍h-thâu khì chiū in, chiâⁿ in-ê pháiⁿ ì-sù. M̄-nā án-ni , koh kàu hiān-kim thiⁿ-ē bān-kok lóng ū tit-tio̍h hok-im, chē-chē lâng chai Pí-lia̍p-to ê chêng-iû , m̄-kú bô chi̍t-lâng o-ló i-ê bêng-bōng, ta̍k lâng lóng hiâm i bô táⁿ m̄ chiâⁿ koaⁿ-hú ê thé-thóng ; in-uī hit ji̍t thiⁿ-ē tē-it hó ê lâng lâi hō͘ i sím-mn̄g , i iā bô châi-tiāu thang pó-hō͘ i.
2. Hi-lu̍t-oân. Hit-ji̍t i lâi Iâ-lō͘-sat-léng chē i-ê chō-uī , i-ê jîn-sûn lóng uî teh kā i pho͘-pâi ; i ū thiaⁿ-kìⁿ Iâ-so͘ ê tāi-chì, kú-kú ài khoàⁿ i. Taⁿ Pí-lia̍p- to kè Iâ-so͘ khì hō͘ i pān ; chāi Hi-lu̍t-ông phah-sǹg Iâ-so͘ ún-tàng hoaⁿ-hí thàn i-ê ì-sù beh kiâⁿ chi̍t-ê khah kî-koài ê sū, hō͘ ông chhin-ba̍k khoàⁿ-kìⁿ, khoàⁿ liáu chiū khah kam-sim lâi tháu-pàng i. M̄-kú Iâ-so͘ m̄-nā bô kiâⁿ hit-hō sū , liân kok-ông teh mn̄g i , iā bô chhut-siaⁿ in chi̍t kù ; ché sī cháiⁿ-iū ? Sī in-uī Hi- lu̍t ông só͘ kiâⁿ ê tāi-chì chin pháiⁿ , ū pāi-hoāi jîn-lún ( Má-khó 6 : 17 , 18 ) , m̄ nā bē kham-tit chò ông , iā sī bē kham-tit kap láu-si̍t lâng kóng oē. Ông liōng- pit chai-iáⁿ Iâ-so͘ ê ì-sù, m̄-káⁿ pān i , kan-ta hì-lāng i, sàng i tò-khì hō͘ Pí- lia̍p-to pān. M̄-kú sim-lāi àm-chīⁿ ū chin kiàn-siàu, in-uī tng chèng-lâng ê bīn-chêng tú-tio̍h Iâ-so͘ biáu-sī (Lô͘-ka 13 : 31 , 32 ). āu--lâi Hi-lu̍t ông hō͘ Hông-tè pián i-ê ông-uī chhiong-kun liû khì sai-pêng , soà sí tī-hia , bô koh tò- tńg--lâi i-ê pún-kok.
3. Chè-si tha̍k-chheh lâng. In lia̍h Iâ-so͘ chò oan-siû tuì-te̍k ; Iâ-so͘ bat tng chèng-lâng ê bīn-chêng toā chek-pī in. In kú-kú kè-bô͘ beh lia̍h Iâ-so͘, chóng--sī bô ki-hoē, lia̍h bē koè-chhiú. Kàu hit ji̍t in-ê tô͘-bô͘ chiàⁿ chiâⁿ, ū thàn in ê sim-ì , lia̍h Iâ-so͘ hō͘ koaⁿ-hú gí-choē tèng tī si̍p-jī-kè , sńg-sī tek-sèng hong-biān tò-khì in chhù ; kiám m̄-sī chin lâng-khì , hián-bêng in-ê pún-sū hō͘ peh-sèⁿ koh khah kiaⁿ-uì i ? Kî-si̍t iā sī bô. Hit-ji̍t in saⁿ-pái làu-khuì. Chi̍t pái sī tuì Pí-lia̍p-to kóng , Kai-sat í-goā goán bô pa̍t ê ông. Chit kù khiok iā ū hó ì-sù , m̄-kú in kóng hiah-ê oē giám-jiân chhin-chhiūⁿ teh kóng in sī pêng-siông ê kok bô koh-iūⁿ pa̍t pang-kok , lián-chún m̄-sī Siōng-tè ê peh-sèⁿ iā bô teh ǹg-bāng Bí-sài-a lâi chò in ê ông. iū-koh chi̍t-pái kóng, I-ê hoeh kui tī goán í-ki̍p goán ê kiáⁿ-sun. āu-lâi chit kù oē chin-chiàⁿ ū èng-giām. Tuì hit-sî kàu taⁿ Iû-thài-lâng lô-lo̍k sì-soàⁿ tú-tio̍h chē-chē hāng ê kan-khó͘ ( Má-khó 13 : 19 , 20 ). Goā-kok lâng pháiⁿ khoán-thāi in, khiok toā-toā thang hiâm : m̄-kú iā thang kóng ché sī in chū-chhú-jio̍k--ê, ka-tī chò tit lâi--ê. Tē saⁿ hāng sī in chhut-khì khoàⁿ Iâ-so͘sí tis7...p-jī-kè khoàⁿ-kìⁿ i-ê thâu-khak-téng ū siá chám-tiâu kóng , Ché sī Iû-thài ông Ná-sat-le̍k lâng Iâ-so͘. In khoàⁿ tio̍h ché jī-iūⁿ chin-chiàⁿ kiàn-siàu , bē bián-tit hō͘ Lô-má lâng thí-chhiò in ; m̄-kú bô hoat-tit ta-oâ, in-uī Pí-lia̍p-to tiâu-kang siá án-ni beh phì-siùⁿ in ; in-uī m̄ kam-goān hō͘ in khah iâⁿ khì. Sui-jiân kóng sī tek-sèng , iáu-kú in bô sím-mi̍h miâ-siaⁿ.
4. Iâ-so͘ ê ha̍k-seng. Iâ-so͘ tú-tio̍h kau-khó͘ ê sî i ê ha̍k-seng khiok lóng bô tú-tio̍h ; in lóng cháu-lī, an-jiân tò-khì in chhù. chóng--sī sim-lāi bô sím-mi̍h an-jiân , bē bián-tit ū loé-chì , in-uī āu-lāi ē hō͘ lâng hiâm in hit mê-hng bô chīn-la̍t lâi pó-hō͘ in ê sian-seⁿ, lún-neh tô-cháu. Pí-tek m̄-nā án-ni , iū koh ēng kè-tì lâi pó i-ê sèⁿ-miā chhut-la̍t kóng pe̍h-chha̍t-oē bô-beh jīn Iâ-so͘; m̄-kú i liâm-piⁿ siūⁿ khó͘-chheh, bē bián-tit ū thî-khàu lâu-ba̍k-sái. Chiàu lán phah-sǹg i ún-tàng chi̍t-sì-lâng m̄-káⁿ bē kì-tit hit mê-hng ê só͘-chò. Iû-tāi m̄-nā sioh-miā iū-koh ū thàn 30 ê gîn-chîⁿ; m̄-kú kàu-boé chin chhi-chhám si̍t-chāi thang khó-liân. Chiàu án-ni khoàⁿ hit-chi̍t-ji̍t Iâ-so͘ ê ha̍k-seng lóng ū mâu-pēng tī-teh; chí-ū hiah-ê hū-jîn-lâng chīn-tiong khó-chhú, in ū kiâⁿ-oá tiàm tī i-ê si̍p-jī-kè-kha , thè Iâ-so͘ hoân-ló ; kàu tē 3 ji̍t i tāi-seng khì sûn bōng , khoàⁿ-kìⁿ i koh-oa̍h.
Chiàu lâng teh khoàⁿ, hit-sî Iâ-so͘ toā kiàn-siàu, hō͘ lâng tèng-sí tī hoān-lâng ê tiong-kan, i-ê tuì-te̍k kap koè-lō͘ ê lâng lóng thí-chhiò khoàⁿ-khin i ; i kan-ta tiām-tiām thun-lún. chóng--sī lán chai hit-tia̍p sī toā êng-kng ê sî , tuì hit-sì i chò sè-kan lâng ê Kiù-chú. I pún-sin kóng, Goá nā hō͘ lâng kú-khí lī-khui tē chiū ín-chhoā chèng-lâng chiū-kīn goá ( Hān. 12 : 32 ). In-uī án-ni Siōng-tè ko-seng i ke̍k koân, hián-hek ê miâ siúⁿ-sù i iâⁿ-koè bān miâ ( Hui. 2 : 9 ). In-uī án-ni tē-bīn-chiūⁿ ê kàu-hoē kap thiⁿ-téng ê thiⁿ-sài éng-oán o-ló i kóng, Hō͘ lâng thâi ê Iûⁿ-ko ē kham-tit tit-tio̍h koân-pèng, hó-gia̍h , tì-huī , châi-lêng, chun-kuì , êng-hián , hok-khì ( Be̍k. 5 : 12 ). Sim só͘ goān.
Só͘-í lán tio̍h hun-pia̍t hi-si̍t. Nā chīn-tiong toè Chú lâi tú-tio̍h khún- tio̍k hō͘ lâng chhiò , che thang sǹg chò lán ê êng-kng : nā khì-choa̍t Chú lâi tit- tio̍h chun-kuì , chîⁿ-châi, sè-kan ê miâ-siaⁿ, che thang sǹg chò kiàn-siàu.
