Kong-kiōng Sió-o̍h
(Iu-sî Gōng-sióng.)
(Chiap chêng-koàn 26 bīn.)
1911.04 313 koàn p.35-36
iū chêng Ngô͘-kok(sic) ū chi̍t-ê toā hù-ong khoàⁿ tio̍h pún-kok ê jîn-bîn, náu-la̍t jîn-châi bē iâⁿ-koè choân-kiû; chiū ēng i nn̄g pah-bān ê gîn kiàn só͘-chāi, bé kok-tiong ióng-chòng ê jîn-châi, chhut-sek ê lâm-lú, kā in phit-phoè, ì-sù ài kái-liông hit-hō lâng chéng hō͘ chiâⁿ-mi̍h. Chit-hō-sū to ū lâng khéng uī-kok tô͘-bô͘ lah; hô-hòng lán ê Chú hiah jîn-chû, chit-hō-sū m̄-khéng uī i soat-hoat?
iū tng-sî Iâ-so͘ tī sè-kan, ū pháiⁿ hū-jîn-lâng kam-goān ēng kuí-nā cha̍p kho͘ ê hiuⁿ-iû boah Iâ-so͘, iū ēng bô kè ê ba̍k-sái, thâu-mn̂g, chhuì, lâi hiàn-hō͘-i. (Lō͘. 7:37, 38.) iū ū Iâ-so͘ ê ké pêng-iú Se-bûn kam-goān khai-chîⁿ pān chi̍t tè toh lâi chhiáⁿ Iâ-so͘(Lō͘. 7:36). Hô-hòng lán sī Iâ-so͘ ê chin pêng-iú lah (Hān. 15:14). Kài-pháiⁿ ê Sat-kai chi̍t-ē kau-poê tio̍h Iâ-so͘, liâm-piⁿ goān ēng chi̍t-poàⁿ ê ke-hoé lâi chín-chè sàn-hiong lâng (Lō͘. 19:8). Lán chiah-ê Sèng-hoē-iú, sui-jiân bô Sat-kai ê toā ke-sū, nā-sái ēng 100 ê 3 hun lâi the̍h chhut, chit-chân gī-kí ún-tàng chiâⁿ; iā nā án-ni chò, put-kò chhin-chhiūⁿ toā-chhiū lut 3 hio̍h, toā-kang kiám 3 poe chuí, kiám ē ko͘ ki, chuí ta mah? àn-choáⁿ bô?
Sī-lah! Sī-lah! Lia̍t-uī khoàⁿ Pò ê hoē-iú ah! Boeh sī hit-tia̍p goá teh ìn i ê sî, hō͘ lín thiaⁿ-tio̍h; lín mah(sic) beh tàu chàn-sêng kóng "Tio̍h, tio̍h, bô chhò." Taⁿ chhiáⁿ lín lia̍t-uī siūⁿ khoàⁿ, chit-chân nā bô koan-hē chiū kā hiân-teh; nā sī lán Sèng-hoē ê toā koan-bo̍k, tio̍h chiū-kín lâi kó͘-bú siat-hoat; mê-nî-thâu chiū thang khoàⁿ-tio̍h kong-o̍h khui, tāi-ke kám-siā Siōng-tè. Khiok sio̍k-gú kóng, "Chò-sū khí-thâu lân", iū "Chhut-thâu tio̍h sńg-kak" ; che khiok ū-iáⁿ; m̄-kú lán tit-tio̍h Siōng-tè si-in chò I-ê kiáⁿ, sio̍k kng-bêng, tio̍h kiâⁿ kng-bêng (Hut. 5: 1, 8), chai thang uī-tio̍h Chú ê tāi-chì lâi tio̍h-boâ, ún-tàng bô khang-khang (I Lîm. 15: 58). án-ni-siⁿ chai thang chīn só͘-ē lâi kiâⁿ, put-lūn sím-mi̍h téng-lâng, tit-tio̍h Chú ê pò-siúⁿ (Hut. 6: 8).
Kì-tit chá-nî Sin-bûn-pò teh kóng, Ngô͘-kok ū chi̍t-ê toā thâu-ke, sū-gia̍p chin khoah, koán-sū iā chin chē, tiong-kan ū chi̍t-ê koán-sū, káⁿ sī miâ kiò Chhi-bê. Chi̍t-ji̍t in thâu-ke beh kā siu-chîⁿ chò chi̍t-chân hó-sū. I chiū kóng, Bô chîⁿ in-uī chhiū toā ńg chiū toā, tiàm-lāi sin-lô, huì-hāng, tiàm-soè, ka-hù-soè, êng-gia̍p, kong-ha̍k-hāu, gī-ióng lām-tuī, pó-kah-huì, ài-kok hū-jîn-hoē, bú-tek-hoē, chióng-chióng to beh chîⁿ, thài ū thang hō͘ lí leh? Thâu-ke iā bô pìⁿ-bīn un-sûn kap i chham-siâng kóng, Ū-iáⁿ lah, goá iā chai án-ni; m̄-kú chit-chân ê hó-sū, lī(sic) to iā put-chí gâu siat-hoat, pa̍t-mi̍h khah liám khai leh, poah koá lâi hō͘ goá, lán to ū hit hō ióng-ló ê kui-lu̍t, pa̍t-ji̍t goá chiah hó khoán-thāi lí, hō͘ lí toà chin-sóng, ēng chin-chiok, kàu-sî goá lâi kiò lí, bô sit-gō͘. Chhi-bê sim siūⁿ khiok ū-iáⁿ, m̄-kú chêng i chi̍t-ê hó pêng-iú, miâ Sè-bô͘, kā i kóng, Bó͘-uī ê thó͘-jîn, chuí-chhân chin chē chin puî, chi̍t-chheng- gîn bé chi̍t-ji̍t; i siūⁿ beh khì bé lâi chò pún-sin kap kiáⁿ-sun ê su-gia̍p; goá nā the̍h hō͘ thâu-ke, to kiám-chió khì lah? Só͘-í ngē-sim ìn thâu-ke kóng, Bô thang hō͘ lí. Thâu-ke bô ta-tit-oâ tńg-khì, tuì pa̍t-uī khì siu.
Kàu i khí-sin liáu, Chhi-bê liâm-piⁿ khiâ-lû, kiò lô͘-po̍k toà chi̍t-chheng-kho͘ khí-sin beh khì bé chhân-gia̍p, kàu-uī kóng tiāⁿ-tio̍h. Keh thiⁿ-kng ji̍t boē chhut, thâu-lâng chio thó͘-jîn khì kàu tī soaⁿ-chiam, li̍p chi̍t-ki kài-phiò, tuì Chhi-bê kóng, "Tah goán ê gia̍p tī bīn-chêng, bêng-bêng kui-phiàn pîⁿ-iûⁿ che lóng sī. Put-kò goán ū tēng-lē, ji̍t-chhut lo̍h-khì kiâⁿ-khí, goá kiò lâng chhah kài-ān, nā kàu ji̍t tú-lo̍h lí kàu phiò-kha, só͘ kiâⁿ-koè chiū lóng kui-lí; nā ji̍t-lo̍h boē kàu phiò-kha, gîn siau--khì, gia̍p kui-goán."
I ìn hó, chiū khí-sin ti̍t-ti̍t phoe-miā-kiâⁿ kàu chhuì-ta, pak-tó͘-iau, kha phoà-khang, ià-siān, toā-chhoán, m̄-kam hioh-khùn lim-chia̍h. Kàu ji̍t beh lo̍h, khoàⁿ-tio̍h soaⁿ-kha oat-kak chi̍t-phiàn, puî koh ū lâu-chuí; phah-sǹg chêng hiah ê hō͘ lâng choh, chia ê khah-hó lâi ka-tī choh; m̄-kú ji̍t-thâu i̍t-lo̍h, kiaⁿ-liáu gîn siau; só͘-í bián-kióng piàⁿ-miā kiâⁿ, kàu-uī ji̍t tú-lo̍h; m̄-kú la̍t-chīn, thò͘-hoeh, chiū-sí tī hia.
I-ê thâu-ke kiò pa̍t-lâng kā koán hit-hūn-gia̍p; lô͘-po̍k tī phiò-kha ku̍t chi̍t khang, tn̂g 7 chhioh khoah 4 chhioh; kā i bâi-chòng, kî-û kap i bô kan-sia̍p. Thó͘-jîn gîn phāiⁿ chò i khì, chi̍t-lō͘ iân-lō͘ chhiò kóng, Chhi-bê, Chhi-bê, lí chin-chiàⁿ sī Chhi-bê; bô chhò lah!
Lia̍t-uī hó pêng-iú ah! Lán kā siūⁿ chit-ê Chhi-bê, si̍t-chāi sit táⁿ-sǹg. Lán iā sī Siōng-tè ê koán-sū, āu-lâi lán tit-tio̍h iā sī chi̍t-tè bōng-tē nā-tiāⁿ; lán ê Chú iā kap lán iok beh thè lán pī-pān hó só͘-chāi, koh lâi chiap-la̍p lán khì (Hān. 14: 2--4). Lán iàu-kín tio̍h thé-thiap Ki-tok ê sim, m̄-thang kan-ta kiû lī-ek ka-tī (Huî. 2: 4, 5). Kàu lîm-chiong-ji̍t chiū tit-tio̍h bô lâ-sâm, pāi-hoāi, huì-tuī ê ke-gia̍p, in-uī lán pī-pān ê ( I Pí 1: 4). Chhiáⁿ lán tāi-ke chim-chiok siūⁿ, o̍h Pa-lu̍t-se kap hù-ong ê só͘-chò; bô kiâⁿ tio̍h Chhi-bê ê lō͘-kèⁿ; sī sim só͘-goān.
