飛行機
1911.06 315卷 P.54
坐風蹛半天飛，不過是兩千年前列子ê空想；龍宮thit迌kan-ta是笑談孽語。總是佇這20世紀，科學界ê大進步，實在是予人聽著ē驚，看著會chhoah。
自古以來，人類是踮佇地上ê活物，若是對知識ê精進，理論加添，實用發現，就人毋若會得做魚踮bī佇水內，也ē學鳥飛佇半空中。潛航艇 (就是海內ê船)久久就teh實用；飛行機 (就是飛船)是近來chiàⁿ發明。佇日本雖未偌大成功，佇歐美是已經出對試用界入佇實用界lah。
伊ê作法毋若一款，有雙葉式，單葉式，各發明家攏有伊ê名，oh得一一記載明白。
大阪朝日新報社，對美國聘請飛行家三名帶飛行機兩張來，三月12日佇大阪練兵場飛行，有飛行三擺。第一擺是普狀飛行。第二擺有上到 2350 英呎。第三擺 上到 2000 呎 ê時就展伊ê本事，運轉停止，放予伊勻勻仔墮落--來，攏無損害。
彼日入場ê人倚80 萬。久邇宮邦彥王。多嘉王二位殿下也來看。實在是以前未捌有ê好光景，佇日本飛行成功ê第一擺。(T. Th. Ts.)
|
