黃嘉智ê 小傳
四十六年前，tī主後1865年，馬醫生kap 杜牧師對廈門過來台灣傳道設教。 hit時有一個少年人姓黃名嘉智kap in來； 伊本是漳州石馬 ê人，對打馬字牧師受洗禮。 Hit-霎 ê時陣，台灣ê人iáu-boē有人拜上帝。
為著 hit時馬醫生被人革逐soá去打狗設醫館， 黃先生也kap伊去，iú-goân 做伊ê 助手，禮拜日續講道理hō͘人聽。三四年後馬醫生koh 倒轉來台南府， 打狗行--裡 ê人就央託伊請一個萬醫生來打狗替伊ê缺。 萬醫生歡喜來咱ê 醫館行醫； m̄-kú 醫館內ê代誌攏是黃先生料理。無loā-久萬醫生去廈門，kah伊ê小弟來接伊ê 缺；有人稱呼伊做小萬。 Hō͘-來小萬先生去福州， koh 換一個連醫生來。Hit 幾年ê中間換幾若ê醫生，m̄-kú醫館內ê代誌猶原是黃先生teh照應。
後來換梅醫生來，也hit個醫館倒壞，黃先生soà去埤-頭，tī 北門soā家治開西藥店。 Hit-tah教會ê兄弟揀伊做長老，ta̍uh-ta̍uh 留任， 做幾若十年ê久。有一個查某囝嫁hō͘ 府城榮安堂 ê先生吳 Sûn-jîn； 到舊年ê中間伊就來toà 府城。hit時已經七十外歲。 近來伊ê身體有khah nó͘-mō͘； 到 6月14號平安過往。 Tī 6月18號出葬，有濟濟人來送； thang叫做福壽兩全。
|
