Tiâu-kìⁿ Kok-ông.

1911.09  318 koàn  p.76-78

  [Tâi-Eng-kok ê Kok-ông ài hián-bêng i ū chun-tiōng lán-ê Sèng-kàu, chiàⁿ tiàu Tāi-hoē ê Hoē- chèng ji̍p-tiâu khì tiâu-kìⁿ. Chûn-nî Chó͘-ke ê Tiúⁿ-ló-kàu chhiáⁿ Soàⁿ-thâu ê Khip Bo̍k-su chò Hoe-chèng; só͘-í kū-nî i iā ū khì tiâu-kìⁿ. āu-lâi chiong i só͘ keng-koè ê tāi-chì siá chi̍t-tiuⁿ phoe hō͘ Eng-kok Chú-ji̍t-o̍h ê ha̍k-seng. Chím-má hoan-e̍k Tâi-oân oē, ìn tī ē-té; hō͘ lán Chú-ji̍t- o̍h ê ha̍k-seng thang khoàⁿ.]

  Goá kin-nî hō͘ goá ê ông I-oa tiàu goá khì tiâu-kìⁿ; tuì án-ni-siⁿ goá tit-tio̍h kuí-nā hāng ê kà-sī, hō͘ goá khah ē chai lí goá cháiⁿ-iūⁿ ē-tit chhin-kīn lán Chú Iâ-so͘, chiū-sī thong thiⁿ-kha-ē ê toā Kun-ông. Taⁿ ài chiong goá só͘ tit-tio̍h kuí-nā hāng ê kà-sī kóng hō͘ lín thiaⁿ.

  Thâu-chi̍t-hāng chiū-sī chiap-tio̍h chi̍t-tiuⁿ thiap, chit-tiuⁿ thiap khoàⁿ-*kiⁿ sī chi̍t-tiuⁿ sè-sè tiuⁿ ê choá; sui-jiân sè tiuⁿ choá, m̄-kú sī goá-ê Ông ê sèng-jū, goá tek-khak tio̍h chun-thàn. āu-lâi chiap-tio̍h pō͘-koaⁿ ê bûn-su, siông-sè pò goá chai, goá tio̍h chhēng sím-mi̍h kong-ho̍k. Ta̍k kiāⁿ sui-sī sió-khoá ê mi̍h iā ū siá-bêng, chhin-chhiūⁿ bō, saⁿ, o͘-tiû ê boe̍h, ê, ê ê téng-bīn tio̍h koà chi̍t-ê gîn kho͘, pe̍h ê chhiú-lok, iā tio̍h chhēng chi̍t-niá âng ê tn̂g-phàu chò goā-bīn, tn̂g-phàu ê heng-chêng koà nn̄g choā khoah-khoah ê pe̍h-lîn; in-uī goá sī jīm thoân Siōng-tè ê tō-lí Bo̍k- su ê chit, só͘-í chiah tio̍h chhēng chit- hō ê phàu. ài ji̍p-khì Ông bē- sái tit chi̍t-kiāⁿ ka-tī chú-ì-tit, lóng tio̍h chiàu só͘ bēng-lēng ê kui-kí. Sèng-keng iā án-ni kā lán kóng, ài kìⁿ Siōng-tè tio̍h chhēng ha̍p-gî ê saⁿ, chiū-sī chhēng gī chò phàu, sī Siōng-tè ê Iûⁿ-ko, tam- tng sè-kan lâng ê choē ê, chiong I-ê hoeh sé-pe̍h--ê.

  Goá iā-sī kóng chit-pái ē tit-tio̍h Chhēng âng-phàu koà pe̍h-toà, goá chīn hoaⁿ-hí, m̄-chai lín thiaⁿ-kìⁿ ē kî-koài bē?In-uī chiàu Au-lô-pa ê lē, chò Bo̍k- su ê lâng pêng-sî tio̍h chhēng o͘-sek ê in-chiûⁿ; chhut-lâi thoân hok-im ê hó siau-sit, lē koh khah giâm, tiāⁿ-tio̍h tio̍h chhēng o͘-ê. Chiàu se-kok ê lē, lâng tú-tio̍h iu-būn á-sī toà-hà chiah tio̍h chhēng-o͘. Chiàu án-ni lâi khoàⁿ, lâng thoân Siōng-tè jîn-ài ê hó siau-sit, kap khò lán ê Chú Iâ-so͘ Ki-tok só͘ tit-tio̍h sin ê oa̍h-miā kap chin ê khoài-lo̍k, siat-sú nā lâi chhēng-o͘, kiám m̄-sī chám- jiân bô ha̍p?Sit-chāi chin khó-sioh. Chiàu goá phah-sǹg goá nā khì thoân tō-lí, goá sī ài chhēng pe̍h kap âng kap chí-sek ê i-ho̍k. Só͘-í goá hit-ji̍t ji̍p-khì kìⁿ ông ê sî, goá hoaⁿ-hí in-uī hit-chi̍t- pái goá só͘ chhēng ê lé-ho̍k, si̍t-chāi chin tuì-tuì ha̍p-gî,－pe̍h-sek lâi kì-liām Thiⁿ-siâⁿ ê pe̍h-phàu, âng-sek sī piáu-bêng khò Ki-tok ê hoeh lâi tek-sèng.

  Hit-ji̍t khì kū ê ông-kiong, hit-ê keng kiò-chò Sèng Ngá-kok ê keng, chiū peh- chiūⁿ chi̍t-tiuⁿ toā-tiuⁿ ê lâu-thui, ji̍p toā-thiaⁿ. Thiaⁿ-ni̍h ê piah-téng ū koà oē-tô͘; thiaⁿ-lāi ū chē-chē ê bûn-bú koaⁿ- oân chhēng suí-suí ê kong-ho̍k, ū siuⁿ kim-piⁿ, soān-chio̍h, chin-chu. Goá kiâⁿ chìn-chèng, chai kóng ū koaⁿ-oân tī-teh, chim-chiok khoàⁿ, khoàⁿ ta̍k-lâng só͘ chhēng ê lé-ho̍k ū ha̍p-gî á-bô. Tī-hia chió-chió lâng bat goá, chong--sī goá só͘ chhēng ê ta̍k-kiāⁿ lóng chiàu bēng-lēng, koh chhiú--ni̍h the̍h Kok-ông ê thiap, bô lâng káⁿ chó͘-tòng goá. Tī goá ê chêng-āu chó-iū ū chē-chē lâng chhēng lé-ho̍k, hiah-ni̍h pâi-chhiâng, kî-tiong bô chi̍t-ê pí chò Ki-tok ê lô͘-po̍k teh thoân Hok-im ê só͘ chhēng ê âng- phàu pe̍h-toà khah-suí; goá siūⁿ án-ni iā chin hoaⁿ-hí.

  Thèng-hāu sî-chūn kàu, goán chiū chìn-chêng ji̍p-khì kok-ông ê su-pâng. Chi̍t-pō͘ chi̍t-pō͘ kiâⁿ tuì lióng-pan koaⁿ-oân ê tiong-kan, in-ê ba̍k-chiu kim-kim teh khoàⁿ, khoàⁿ goán ta̍k-hāng lóng ū chiàu lé á-bô. Hit-sî goá sim-lāi teh siūⁿ, siat-sú nā ū chi̍t-ê choē-jîn, choē iáu-boē tit-tio̍h sià, ài-beh tuì hiah uî- uî tī Siōng-tè chō-uī ê Sèng-sài ê bīn-chêng keng-koè, hō͘ in-ê kng-iāu ê ba̍k-chiu khoàⁿ-kìⁿ, hit-ê tāi-chì si̍t-chāi thang kiaⁿ.

  Goá tuì mn̂g ji̍p-khì tiān-tn̂g, khoàⁿ- kìⁿ kok-ông chē tī tiān-téng. Goá chiū chiong hit-tiuⁿ thiap kau-tāi mn̂g-lāi ê sī-sîn. In-uī āu--lâi chit tiuⁿ bô koh lō͘ ēng; lâng nā ē-tit-thang ji̍p kàu chit-ê só͘-chāi ún-tàng m̄-bián kiaⁿ hō͘ lâng koáⁿ tò-tńg. Goá hit-sî sim-koaⁿ siūⁿ- tio̍h Thian-lō͘ le̍k-thêng só͘ kì-chài thiⁿ- sài the̍h hō͘ Ki-tok-tô͘ hit-kńg ê bûn- pîn, téng-bīn khàm-ìn, kah i kàu Thiⁿ-siâⁿ ê mn̂g chiàⁿ kiáu-la̍p, kap chit-ê tāi- chì ū saⁿ chhin-chhiūⁿ. Goá chìn-chêng kàu tiān-chêng, sī-sîn chiong hit-tiuⁿ thiap chiàu chhù-sū thoân chiūⁿ--khì kàu khiā tī Ông ê chiàⁿ-chhiú pêng ê Tāi-sîn. I khui-siaⁿ kiò goá-ê miâ, goá chiū khoàⁿ-kìⁿ goá-ê Ông, thâu-mn̂g chhàm-pe̍h, ū un-hô ê bīn-sek, chhin-chhiūⁿ ià-siān ê khoán, tī-hia teh khoàⁿ goá. Goán tāi-ke hō͘ i chiap-la̍p siāng chi̍t- iūⁿ, ū toā koaⁿ-chiok kap tāi-sîn bô khah ka-hō͘, goá bô miâ-siaⁿ ê lâng bô khah po̍h, pêⁿ-pêⁿ sī tit-tio̍h Ông ê chhiò- iông-chit-ê chhiò-iông thong Au-lô- pa chiu lóng chai, tuì án-ni só͘-í chiàⁿ kám-hoà thiⁿ-ē thài-pêng,－Ông iā thìm-thâu nn̄g-pái, goá iā nn̄g-pái kiok- kiong, chū án-ni ti̍t-ti̍t thè--chhut-lâi.

  āu--lâi goá siūⁿ-tio̍h chi̍t-hāng khah kî-koài. Hit-sî tī tiān-téng ū chē-chē ê toā miâ-siaⁿ ê lâng, pêng-siông-sî goá chin ài khoàⁿ i, nā ū ki-hoē goá bô hiâm hn̄g to sī ài-beh khì khoàⁿ in. Chong--sī hit-tia̍p tī Ông ê bīn-chêng goá choan- sim teh khoàⁿ Ông, ba̍k-chiu bô kang thang khoàⁿ pa̍t-lâng. Chhin-chhiūⁿ tī Thian-tông lâng ê ba̍k-chiu lóng sī chu- chu siòng tī Siōng-tè kap tâng chē-uī ê Kiù-chú ê bīn.

(āu-koàn beh koh chiap.)