公禁罷工
1912.04 p.3
大英國所出ê物中間土炭也是大對重，年年所出有兩萬萬tun， (一tun差不多16擔)，攏是對地礦掘起來。做這號工 ê人嶄然艱苦，卻也是好-趁；一個人每日有時趁三四個銀錢。因為有kin有錢掘有khah 濟--ê是趁 khah濟。M̄-kú有所在真歹掘，人嫌掘少soà 趁無oā。 Hiah ê 做工 ê人有設公會，通國掘土炭ê人差不多攏有入會；若tú-著甚麼公事in ê 幹事員thang聚集議論代誌，hō͘ in大家相照顧，bē 失了大局.
現今幹事員對頭家講：若遇著歹掘 ê所在bē 比得好掘--ê算有kin有錢，總著有一個kài-ān，一日siāng-少定著是幾個圓，雖然掘無hit個額，若認真做工猶原就講到tó一日in攏會齊 m̄ 做工。
到 3月初一果然有百外萬人會齊攏m̄去做，現今無人掘土炭，致到大欠缺，土炭也大起價。致到四位ê 火車減行幾-nā班； 火船也是減行。其餘有用機器ê所在也濟濟著停工， ché m̄是因為人m̄肯做，是因為欠土炭ê緣故，甚至二三十萬人hō͘ 伊連累--著，致到無thang 做工，連外國也hō͘ in連累--著，因為in ê機器廠濟濟是oá靠英國ê土炭。 |
