中國ê 政事
1912.04 p.5
袁世凱參詳beh保護皇帝bē-得-thang因為眾人主義beh設立民主。皇帝也知無法得伊 ta-oâ，就tī 2月第12號有出詔甘願退位，來順百姓ê意思。大家願 准伊有皇帝ê 名色nā-tiāⁿ，政事無chhap，也bē koh傳位 hō͘ 伊ê 囝孫得，猶原toà tī 京城thang kò͘伊ê 宗廟，每年四百萬銀hō͘皇帝做所費。hit時soà hō͘袁世凱 kap 黎元洪 做 正副 ê 統領；其餘ê大官也攏是革命 ê人。從中孫逸仙無做官，伊m̄是好命 ê人，若會得-thang國家興旺，伊就歡喜做百姓。
可惜tī 2月29 暝北京有攪擾；是軍兵心肝m̄願soà出來搶百姓，嶄然有幾-nā日ê 反亂。Tī 天津kap別所在也是án-ni。後來卻khah安靜，m̄-kú失落物真濟；也外國ê 公使看這號勢面，有teh參詳著起家治ê 兵來京城保護。
大家著 求上帝憐憫中國十八省 ê百姓，hō͘ in ê序大gâu設法利益百姓，免得in受著擾亂ê艱苦。長山這霎有假換新曆親像人tī chia ê款，今年號做中華民國 ê 元--年。
有一項thang歡喜就是hiah ê大官濟濟人知影咱聖教 ê利益，無親像清朝 ê 官 teh僥疑。有ê是透道理ê人，bat受洗禮；有ê雖然是boē受洗禮，也知聖教是好事。親像袁世凱伊ê 囝 kap 伊ê 孫有去tī 天津耶穌聖教 ê中西學堂讀冊；可見伊ê體貼咱聖教 ê意思。 |
