Chhiⁿ-hoan ê Jîn-bu̍t
1914.01 346Koàn P.7
Chit pang goá kap Kai Sian-siⁿ, Ông Thoân-tō ū khì Kak-pán-soaⁿ, kìⁿ-tio̍h chi̍t uī chhiⁿ-hoan ê kó͘ pêng-iú, miâ kiò Kim-soán. I tī 10 goā nî chêng bat lâi Tamsui Sîn-ha̍k-hāu tha̍k chheh, i oē hiáu kóng lán ê khiuⁿ-kháu, iah7 bat hàn-bûn. Sī in-uī Chheng-kok sî-tāi, Lâu Khim-chhe ū siat chi̍t keng ha̍k-hāu tī Tâi-pak lâm mn̂g teh kà-sī chhiⁿ-hoan gín-ná, hit tia̍p Kim-soán ia̍h tī-teh. I tuì 8 hè tha̍k kàu 15 hè. āu-lâi khì tiàm tī Kî-lí-goān kuí-nā nî kú, soà tī hia hō͘ lâng chio, ia̍h ū siông-siông khì Kî-lí-goān ê pài-tn̂g lé-pài.
Hit-tia̍p sī Lîm Chheng-hé thoân-tō-su tī hia, Kim-soán kap i put-chí se̍k. āu-lâi tú-tn̄g Kai Bo̍k-su khì hia sûn kàu-hoē, Kim-soán chiū tuì Kai Bo̍k-su kóng i ài khì Tamsui Sîn-ha̍k-hāu tha̍k-chheh. Kai Bo̍k-su ū chiap-la̍p i.
Tha̍k bô loā-kú, i ê toā hiaⁿ ū tuì lāi-soaⁿ lâi phiàn i tńg khì, tiàm tī lāi-soaⁿ la̍k nî kú, koh tsoè chhiⁿ-hoan thâu-khak soà chhiah-jī. Kàu bô kuí nî chêng koaⁿ-hú ū kiò i koh chhut-lâi , ia̍h ū chhoā i khì Ji̍t-pún koan-kong. Hiān-sî tiàm tī Kak-pán-soaⁿ hō͘ i teh tsoè koaⁿ-lī kap Hoan-tông ha̍k-hāu ê sian-siⁿ, i ia̍h bat kok-gú, ia̍h soà teh tsoè thong-e̍k. Goán tī Kak-pán-soaⁿ ê sî, i ū lâi lú-koán thàm goán, kap goán kóng-oē. I kóng i tī Sîn-ha̍k-hāu o̍h ê tō-lí, iáu oē kì-tit, ia̍h kóng Kai Bo̍k-su só͘ sàng i ê Sèng-keng kap Si chit-tia̍p iáu tī teh. Tuì án-ni kā i khoàⁿ, chhiⁿ-hoan ū chit khoán ê jîn-bu̍t, oē hiáu kóng saⁿ khoán ê khiuⁿ-kháu, koh bat nn̄g khoán ê jī, sǹg ia̍h put-chí khó-chhú, bô khah su lâng.
