生番的信
1914.01. 346卷P.7
照人teh拍算，生番是戇戇ná親像動物一樣，袂曉信甚物。其實毋是按呢，in 的信有幾若款，信天真大有神佇teh。閣信有靈魂，若死了in 的靈魂著對虹經過，亦信佇虹的中間有3个神佇teh。一个佇這爿的彎，閣一个佇彼爿的彎，猶一个佇中央。In 的靈魂欲經過虹的時，到佇頭一个彎，彼个神欲牽in 的手起來看，看有紅佮血抑無，意思是看有刣人抑無。若是有，經過到彼爿彎的時就有大間媠的厝通踮；若是無，經過到佇中央的時，就予中央的神chhia落海沉落海底。按呢in有這款的信，所以無奇怪in愛刣人，刣愈濟人in愈歡喜。
聽見in講佇in生番的中間，有一个刣第一濟人，就是360人，聽了真正予人通驚。照按呢共伊看生番的信拄拄佮基督教對反。基督到是講刣死人的死後袂得著快樂。按呢基督教著緊備辦傳道理予生番聽，將in 的信共伊chhiâu輾轉，就毋免驚人的頭殼去寄生番囥。 |
