Lūn Soaⁿ-iûⁿ

1914.01 346 Koàn P.9

    A-se-á ê sai-pêng kok biân-iûⁿ kap soaⁿ-iûⁿ sui-sī hō͘ siāng chi̍t ê bo̍k-chiá chhī , iáu-kú m̄-sī siāng chi̍t kûn. In só͘ chia̍h-ê iā bô sio-siāng, in-uī biân-iûⁿ ài tiàm soaⁿ kha khah ū iù-chháu ê só͘-chāi, chóng-sī soaⁿ-iûⁿ ài khì khah koân khah bô chháu ê só͘-chāi lâi chia̍h sè châng ê chhiū-á.

    Iû-thài lâng m̄-nā ēng iûⁿ-ko lâi hiàn-chè, koh ū ēng soaⁿ-iûⁿ-á. Liân tī Jû-oa̍t-cheh ēng ''mî-iûⁿ, soaⁿ-iûⁿ lóng thang'' (    ).

    Chi̍t nî chi̍t pái tī sio̍k-choē ê ji̍t tio̍h hiàn 2 chiah soaⁿ-iûⁿ hō͘ Siōng-tè. Chè-si-thâu tio̍h '' thiu-chhiam; chi̍t chiah kui Goá; chi̍t chiah kui A-sat-sek''(    ). āu-lâi chiū chiong chit chiah lâi thâi, iā hit chiah oa̍h-ê A-lûn tio̍h hō͘ I ''thè Í-sek-lia̍t cho̍k tam-tng choē-koà'', soà ''pàng i khì khòng-iá kàu hong-hoè ê só͘-chāi'' (    ).

    Soaⁿ-iûⁿ ū toā lō͘-ēng. Hit hō toā chiah-ê bah sī khah chho͘, phái chia̍h, Kî-tiân ū pī-pān soaⁿ-iúⁿ-á lâi chhiáⁿ Siōng-tè ê Sù-chiá(    ). Kin-á-ji̍t A-lat-pek lâng iā ài án-ni khoán-thāi lâng-kheh.

    Lâng teh thâi soaⁿ-iûⁿ, chin sè-jī bô phah-pháiⁿ hit ê phoê. Thâu kap kha tio̍h lóng chām tn̄g, chiong phoê kui niá pak--khí-lâi, lóng bô koah phoà. Tī 4 kha kap boé ê só͘-chāi ū khang;chiah ê khang liâm-piⁿ thīⁿ oá, iā kui niá phoê tio̍h hoân koh keng hō͘ I ân. āu-lâi ēng i chò chiú-lông á-sī chuí-lông.  ām-kún chò lông ê chhuì,teh ēng ê sî tio̍h pa̍k ân. Beh toà chuí á-sī chiú chò lō͘-tiong ê lō͘-ēng, tio̍h té tī hit hō ê lông; in-uī hit-sî iáu-boē ū po-lê-kan. Lông nā pháiⁿ-khì chiū koh pó͘ ; chhin-chhiūⁿ Ki-piàn ê peh-sìⁿ beh phiàn Iok-su-a ê sî, ''In ê chiú-lông chiū-sī ēng kū phê li̍h koh-chài thīⁿ--ê'' (    ). Hit hō kū lông tio̍h té chuí á-sī kū ê chiú, chóng-sī bē kham-tit té sin-chiú, ''kiaⁿ-liáu sin-chiú li̍h lông, chiú lāu, lông phah-pháiⁿ ''(     ).

    Soaⁿ-iûⁿ leng iā sī chin ta̍t-chîⁿ, ū-sî sī chhiⁿ-chia̍h, á-sī chò lin-iû. Soaⁿ-iûⁿ ê mn̂g iā sī chin ióng, ē khàm-tit pò͘-pîⁿ. Su-lī-a kap A-lat-pek ê soaⁿ-iûⁿ mn̂g khah siông sī o͘ sek. Só͘-í Ngá-kok beh tuì Lia̍p-pan the̍h kang-chîⁿ ê sî, I kóng. ''Goá beh chhâ lí ê cheng-siⁿ, hoān-nā hoe-pan chiâⁿ-tiám ê soaⁿ-iûⁿ... lóng koáⁿ I chhut-lâi chò goá ê kang-chîⁿ'' (    ).Lia̍p-pan káⁿ-sī phah-sǹg hit hō hoe-pan chiâⁿ-tiám--ê sī khah chió, só͘-í hoaⁿ-hí chún.

    Kiù-chú ū siat soaⁿ-iûⁿ kap biân-iûⁿ ê phì-jū, ēng bo̍k-chiá teh pun iûⁿ lâi pí-phēng Ông teh sím-phoàⁿ. Tī hit ê phì-jū lāi soaⁿ-iûⁿ sǹg sī chí Ông só͘ m̄-ti̍h--ê. (    )