教會的新聞。
1914.02 347卷 P.5
苑裡的禮拜堂因為買地真oh，所以姑不將買佇Biâu-u庄，現時已經興工teh建築。Biâu-u庄離苑裡卻無偌遠。
中壢的教會近來不止活動人額亦漸漸teh加添。現時遐的會友不止出力teh鼓舞欲去新的禮拜堂，已經有提金五百外箍，向望到尾會得著成。
雞籠的傳道師，吳廷芳，有報告講佇in遐有一個兄弟名王高發，伊的目睭7年久攏無看見，後來有去Tamsui偕醫院治療，無偌久漸漸得著光明。伊佇遐有紲得著道理，對按呢來信主。現時倒轉去teh做行商。伊四界行m̄-nā袂物紲報揚道理，攏無厭倦亦無驚見笑，攏是將伊的目睭得著光明的代誌來講予人聽」。有拄著予濟濟人恥笑，joē罵tsau-that；捌一擺伊的雨傘予人用火共伊燒破，亦捌一擺伊的物予人the̍h去才無錢，亦捌予人jip欲拍。雖然按呢猶kú伊無失志，猶原閣講道理無驚。伊有引chhoā 四家的人來信主閣有chhoā 濟濟人來聽道理，伊禮拜日攏無歇睏禮拜。雖然是艱苦人猶kú提緣比別人較出力。伊毋捌字亦真出力學養心神詩，現時規本攏會曉讀紲捌淡薄字。這款的兄弟實在真可取，伊的氣力會堪得做模樣予人學。 |
