長老的感激。
1914.03 384卷 P.4
佇蘇格蘭有一個大城。對彼城內有濟濟少年人來求入教會。較濟攏是對siāng一所在來。牧師真奇怪，就去查問彼个因端才知彼tah有一個真熱心的長老，閒的時ta̍uh-ta̍uh去佮遐的少年交陪來鼓舞in 的心，予in知做主的工是大寶貝。將主的疼痛來感激in；對按呢遐的青年人想著長老的感動來入教會；紲出頭歡喜獻身做主的工程。
Taⁿ佇台灣有大欠缺彼號的長老；毋是講攏無；實在有，總是真少。是佇佗位通知？看大學少少少年人愛求入。醫學校是較濟，因為是較好利路。若有長老大要緊來鼓舞佇逐教會的少年人予in明白知主的工，紲予in知救人的神魂，是比金銀較寶貝，也教會的確穩當受著救人的利息較濟。
現時少年的心真要緊趁大錢較無想救人的關係。向望有長老teh欲出頭親像行洗禮約旦做救主的聲來苦勸少年人，kah in看主的五穀濟濟，收成的人少少；著知為著主著磨的人，毋是空空。
佇英國逐年有卒業生歡喜便便teh聽候宣道會主理派in去佇拜佛的國傳道理。若受派著的人，就伊的本公會佮伊的親戚替伊真歡喜，因為真體面，比趁大錢較榮光。佇台灣kiám無這等號的青年mah？ |
