論加拿大教會。
1914.03 348卷 P.7
加拿大長老教現時洗禮的大人有三十萬較加，拜堂四千外間，牧師大概有兩千外，長老有一萬較加。舊年所題的金總共有一千萬銀。論題緣宣道出外佇異邦的所在會友不止甘願；每年題八十萬銀。閣現時逐年大概有五十萬人對別國徙來加拿大開墾佮做生理。新開墾的所在要緊著設拜堂，予新來的人會聽道理。毋kú開墾的人較無氣力通擔當牧師的束金佮起拜堂；所以教會著題緣來補助。加拿大長老教的補助會每年題緣大概成百萬銀。
對按呢來看加拿大的教會論題緣不止有出力。雖是按呢，iáu-kú有人講教會著閣較出力，題緣較濟來傳道理佇異邦佮本國逐所在。
所以舊年6月有聚集通加拿大長老教特別的商議會來議論教會的情形。赴會的會員就是牧師，宣教師佮各教會派一个代議長老。計共有五千外的會員；金姑娘佮葉牧師亦有去赴。會場是佇加拿大第二大的城名叫多倫多(Toronto)。有稅一間公堂會坐五千外人。長老教的總會聚集的時是拄拄接續商議會。商議會的會員較濟就按呢有紲來赴總會。兩个會連續聚集有12日的久。有議論真濟項關係佇教會。實在赴會的人真好機會。
赴會的所費著二十萬箍。這个所費是教會內十个好額人出；每人出兩萬。掌管多倫多城總長的官真好禮；有設歡迎會請攏總的會員，閣有設法予會員12日的久坐電汽車的時攏毋免錢。多倫多的教會亦是真好禮；有備辦所在佇家己的厝予會員睏，閣好款待in。有的真甘願克己予赴會的人較快活。
會員猶未四散的時有相佮守晚餐。有四千外的人同時守晚餐。捧杯著百外的長老。雖然有hiah濟人，iáu-kú逐項真次序。Hiah濟人同心一意相佮紀念咱的主，實在予赴會的人無毋得著大感激。 |
