教會的新聞
1914.03 348卷P.8
艋舺的教會佇正月初一的昏有做主日學的祝賀會，不止鬧熱。拜堂的內外有裝飾真好看，款製親像12月25號，耶穌生日的事，不過是kan-ta共主日學的學生祝賀nā-tiāⁿ。有真濟人來看，拜堂坐到滿滿。主日學的學生有做幾若齣予眾人看。有的吟詩，有的說教，有的祈禱，有的講論。聖經的故事，有的演說雜項。有4个念200節的聖經，閣有4个念400節的聖經。In有得著加拿大總會的賞狀。艋舺的教會亦備辦濟濟物來送攏總的學生；大家不止歡喜。同彼霎有聖道書院佮女學的學生佮大稻埕主日學的學生佇teh ；有紲請in來吟詩。聖道書院的學生有吟四款的聲，吳牧師娘有ji̍h琴，女學2个學生有奏樂。大家坐了攏袂倦。
大稻埕的教會佇正月初二的昏亦有做主日學的獎勵會。彼日亦是真鬧熱。拜堂的外面有結綠門，內面有結花佮旗。看了嶄然好看。來看的人無所在通坐。主日學學生有將in所學的來講予眾人聽。有的讀聖經；有的講舊約的故事；有的問問答；有的越念聖經；有的講道理的譬喻；有的吟詩。其中第一有趣味--ê，就是有一個囡仔名大衛，4歲nā-tiāⁿ，會讀詩佮念聖經節，佮祈禱文；看的人無毋感心。有請艋舺的主日學的學生吟詩，亦有請聖道書院的學生佮女學的學生吟詩。吳牧師娘有ji̍h琴。大家看了真活動。
大甲的教會近來漸漸teh進步。佇2月1日吳牧師有去遐閣設立一个長老。伊的姓名就是陳開丁。In猶未捌擔當傳道師的束金。今年欲頭擺擔當，有提緣兩百外箍。大家參詳欲擔當9月日。按呢實在通呵咾in 的出力，向望mâ年會擔當全部。 |
