紀念。李牧師的小傳。
1914.04 349卷 p.6
三月9號大稻埕的牧師李壬水有過往，10號有出葬。Taⁿ將伊的來歷來小可講起記佇教會報，予眾兄弟姊妹會看。
李牧師出世佇崙仔頂，家內真艱苦。伊7歲的時父母攏死。伊就蹛佇伊的嬸兜。總是伊的嬸無好款待伊，予伊佇遐真艱苦。後來伊就出去予人倩做長工，亦有佮人thoā淡薄字。後來就去溪尾食舖做外掌三四年的久。後來就去行船，做押載。三擺船摃破，性命險險無去；路尾擺物紲予人搶去。後來伊有去內山共人記提數。佇遐3年的久就閣轉來崙仔頂。佇崙仔頂伊有拄著破病3年的久，後來有佮人學做司公。彼時有食阿片。
閣無偌久伊有聽見嚴清華傳道師講道理。對彼霎伊就漸漸得著教示來反悔放sak司公的職任，改阿片，服事上帝。偕牧師就接納伊來神學校讀冊。卒業了伊就去做傳道師蹛佇拜堂傳報主的道理。伊所經過有六七位的拜堂，教會不止疼痛伊，到1903年有轉任來大稻埕。1906，明治39年伊有進名做教師。1907年大稻埕的教會有請伊做in 的牧師，所以中會有設立伊。對彼霎到臨終的日伊有做大稻埕同會的牧師。對兩三年前李牧師的身體有較軟弱；近來病ná久ná傷重。到佇1914年3月9日伊有離開世間。佇10日下午兩點鐘出葬。來送葬的人額有宣教師，牧師，傳道士，長老，執事，以及會友；共有200外人。 |
