欲就會，毋就袂。
1914.04 349卷 P.7
陳和
三角湧的教會對設立到這霎有30外年；總是這所在的人較早毋愛信趁道理。彼時常常愛做對敵。早前偕牧師去遐傳道理，予人用石頭摃伊；有一半--的來聽道理的人，予人拍到喙齒折去；有的拍到吐血；有的予人用刀刣紲割伊的 hī鼻；彼个人現時猶佇teh。對按呢來看，早前三角湧的人真歹款待信道理的人。佇1902年的時就有得著10个人領洗禮。彼時有出緣錢攏共Y14.50。
對彼霎到這陣有12年的久。現時有領洗禮的人大細男女，攏共79人，聽道者有50外人。佇今年有會友聽見中會有予四个傳道先生可取進名做教師，通予人請做牧師。In就大家心好膽teh想愛請牧師，毋kú舊年傳道的辛金Y120 nā-tiāⁿ，驚了氣力無夠額通請牧師。後來in大家就鼓舞捐緣的事。逐人攏加出重倍，有人毋若重倍。題緣總共有Y321.30。按呢in就備辦稟對中會去入欲請牧師，閣中會有允准。
對按呢看三角湧的教會無偌濟人，亦無甚物氣力；in大家甘願出力欲請牧師，是對in大家欲就會，毋就袂。第一要緊--的是in大家受著咱的主的教示，講著積聚錢財佇天裡。毋通積聚錢財佇地裡，按呢in才會hiah-nih出力來獻。Taⁿ向望看報的列位兄弟姊妹替三角湧的教會祈禱，求上帝予in ná加添氣力袂倦，這是阮所teh向望。亦向望咱台灣的教會攏會得著聖神，是心所願。 |
