鹿港拜堂
1914.05 350卷 p.10
盧慶耀
佇3月26號鹿港有行獻堂式的禮。禮拜廳懸2丈，深3丈6尺，闊2丈4尺的實內。四面攏有出步，出7尺2寸，內面外面攏鋪磚。壁是用磚疊到3尺3懸。起來就用竹仔編，內面抹花，外面抹糖水花。頭前一个大門2个窗仔，左爿2个窗仔一个門，右爿也是按呢，後面佇上等樓2个海長窗仔，佇下面2个窗仔。窗是走thoah的，也攏是玻璃，門是柴的做西洋式。厝蓋有蓋日瓦。小厝是thiap受起5間。按呢所開的金項，兄弟做工無算在內，共Y2024.53，舊禮拜堂的料拆來起小厝也無算額。
Taⁿ請看報的會友替阮歡喜。有兩層事予咱紀念上帝欲榮光伊的囝咱的主佇這鹿港，就是下地基的時有拄著風颱，佳哉咱boé徛tàng。起好的時有拄著火災，真佳哉咱的禮拜堂有起退後。總講就是上帝欲看顧落成百姓，予主的道理有通佇遮報揚到攏會漸漸聽著。著替阮祈求上帝予這个拜堂無偌久會坐到滿滿。
彼時阮紲設佈道會，千外人來聽道理，有坐到tīⁿ that-that，iáu-kú攏靜靜致意teh聽，望濟濟人受感激。
(盧慶耀記的) |
