台北傳道會。
1914.6，no.351，pp.5
佇5月13日頂晡10點半鐘，台北的傳道會有聚集佇中壢禮拜堂。來赴會的牧師5人，傳道師18人。這pang無告示，所以西國牧師無人來。
主理陳清義有chhoā眾人禮拜佮守聖餐。有請中壢的教會來相佮守，後來開會。這pang有舉柯安樂牧師做新主理亦舉張金波佮郭A-cheng兩个傳道師做正副的史記。這擺頭尾有聚集兩日久，大家有相佮議論利益教會的事，亦逐人有講in本堂的消息來相勉勵；大家聽了不止得著有益。暝時有出去街市佈道。有分做五隊，各牧師掌一隊。大家得著不止好機會，兩的昏總共有1100外人聽見道理。中壢的兄弟真出力giâ燈chhoā路，配置所在。閣有得著支廳長佮警察官的寬容，攏無阻擋，所以有這个好機會通報揚主的福音予hiah濟人聽見。Taⁿ請大家著替chiah 的聽道理的人祈禱，向望佇彼中間有人會來做基督徒。
這pang傳道會聚集佇中壢，有得著眾兄弟姊妹的好款待，著共in說謝。有擬定後會欲聚集佇南崁禮拜堂，因為遐的教會有來請。日期就是新曆10月第四禮拜的拜三，頂晡8點鐘。 |
