彰化主日學。
黃俟命
1914.6，no.351，pp.4
彰化教會佇5年前就有設主日學。彼時學生少少，若是教的人盡力鼓舞，後來學生漸漸加添。總是學生濟濟是教會外的人的囝。彼時較常teh教的先生是林振聲。到佇舊年5月間有閣請10外个先生來教，選舉蘭醫生娘做校長；紲組織一个教員會，對按呢濟濟代誌設備較好勢。現時學生有120外人；這內面會讀聖冊--ê有55个，其餘是讀詩佮字母。
每禮拜頂晡合做伙教詩調，佮萬國主日學課的尪仔圖；下晡是分班，教聖冊，詩佮字母。本然教場是佇禮拜堂；因為有濟濟袂安靜，後來蘭醫生歡喜將醫館的間借阮用，對按呢會得通予每班的學生得著聚集佇一所在，安靜來受教示是真好。
Chiah 的學生每月一擺獻錢做台灣宣道會的費用。Chiah 的 teh教的先生現時有9个，顧問一个，蘭醫生。蘭醫生娘做校長。每月教員聚集一擺，做祈禱會，佮議論代誌。佇舊年新曆12月25有做救主誕(Christman) 的鬧熱，本月11號佮16號有開主日學的運動會，做濟濟thit-thô 的法度，紲予蘭醫生醫生娘請茶餅，先生佮學生大家真心適歡喜吟詩散會。Taⁿ簡簡寫這幾句報列位兄姊知，愛恁替阮祈禱，予阮的主日學會進到佇完全的所在。毋知佇時台灣主日學會得著相通氣脈，做主日學教員的總會。因為主日學是興起教會一項的機關，也是教會的基礎。算是教會中大要緊的這項。獨獨是向望現時擔當這个責成的兄，姊佮同志的諸君出力祈禱出力辦這个代誌。
黃俟命記的。 |
