設立兩个牧師。
1914.6，no.351，pp.5
四月28號中會聚集佇水轉跤來設立葉金木教師做水轉跤教會的牧師。彼日真鬧熱。別所在的教會佮牧師，傳道師有真濟人來赴。閣有支廳長佮幾若个外國的宣教師，姑娘，牧師娘。
本堂的教會佮人客總算計共大概有兩百外人。郭水龍牧師有說教，陳清義牧師有苦勸新的牧師，郭希信牧師有苦勸會友。
五月5號中會有聚集佇三角湧來設立陳清和教師做三角湧的牧師。三角湧是庄裡的所在，拜堂較細間。M̄-kú彼日真好看因為有新修理，閣有結花結樹枝來備辦。葉牧師有說教，蕭牧師有苦勸新的牧師，吳牧師有苦勸會友。苦勸會友的時有勉勵in著出力鍛鍊聖經，紲講起本堂的長老陳成宗已經七十外歲舊年佮今年有越念六百外節的聖經來領加拿大總會獎勵的證書。閣陳長老代先學白話字已經六十五歲才學。Taⁿ毋知佇咱北部逐所在亦有教會已經六十五歲才有學白話字。設使若猶有這款的人請恁寫批通知北部的主筆約Bí-tàn，紲講起代先學白話字是已經幾歲才學。
禮拜煞，赴會的人予三角湧的會友請來食ē晝。三角湧的教會雖罔人額較少，iáu-kú論款待人客無較輸別所在。 |
