Thoân-tō-su ê Phoe.
oán-lí ê Kàu-hoē.
1914. 6, no. 351, pp. 6
"Hó hó tsoè kàu pháiⁿ, pháiⁿ-pháiⁿ iū koh hó". Siōng-tè chiâⁿ oán-lí ê kàu-hoē, sī tī tsûn-nî chhun-kuì: chiū-sī tuì Lâu Tiong-kian Soan-kàu-su tī hit nî ê chhun-kan kàu oán-lí pò͘-tō nn̄g pái, put-chí tsoē lâng lâi thiaⁿ. Liáu-āu Keh Hi-sìn Bo̍k-su iā siông-siông kàu oán-lí kap Bâ-û pò͘-tō, khoàⁿ-kìⁿ hó ki-hoē, Keh Bo̍k-su chiū chhut i ê miâ tuì koaⁿ pín hú-khó. Kàu tī tâng hit nî tsa̍p-it ge̍h, chiah siat-li̍p káng-gī-só͘ tī oán-lí koe, ta̍k hāng chhòng kàu piān, chiah kiò goá khì toà. Goá si̍t-chāi bô chhut-la̍t khì pò͘-tō; kan-ta sī Siōng-tè kám-hoà lâng lâi sìn tō-lí, Kàu kū-nî kū-le̍k gō͘ ge̍h, hoē-iú chiū hoaⁿ-hí tam-tng thoân-tō-hoē tī oán-lí káng-gī-só͘; kàu poeh ge̍h thèng-tō-chiá ê tsóng-sò͘, ū 130 tsó-iū lâng.
Hit sî hoē-iú chiū ài khí pài-tn̂g; goá tī lé-pài-ji̍t liân-soà lé-pài lóng sī kóng hiàn-chîⁿ hō͘ Siōng-tè, chek-tsū chîⁿ-tsâi tī thiⁿ-ni̍h. Kàu-hoē ê lâng ū-ê chhut 300 kho͘, ū-ê chhut 200 goā, ū-ê chhut 100, ū-ê chhut kuí cha̍p, ū-ê chhut chîⁿ koh hiàn kang, iā ū kan-ta hiàn kang-ê; khí pài-tn̂g ê sū, tuì hit-sî chiū tiāⁿ-tio̍h. M̄-kú kî-tiong ū chhián-sìn ê lâng, iā tuì hit-tia̍p chiū thè-tsáu, kiám ū chi̍t poàⁿ ê lâng-gia̍h; che sī tuì tī goá bē-bat tsò-kè thoân-tō, siūⁿ iâⁿ lóng bô siūⁿ su, chiah saⁿ lé-pài koáⁿ tsáu la̍k-tsa̍p goā lâng. Só͘-í kóng, Hó-hó ê sū hō͘ goá tsoè kàu pháiⁿ. Goá siūⁿ āu-pái nā koh tú-tio̍h chit khoán ê ki-hoē, ǹg-bāng put-tì chhin-chhiūⁿ án-ni ê bô hoat-tō͘. Taⁿ kai-tsài Siōng-tè iū koh i-hó lah; kàu-tn̂g tsoân-pō͘ khí hó lah, hiān-sî teh iû-chhat; phah-sǹg tī sin-le̍k chhit ge̍h jī hō beh kú-hêng hiàn-tn̂g-sek.
Kūn-lâi put-chí ke-thiⁿ lâng-gia̍h, hiān-sî muí lé-pài ū chi̍t pah it-jī-tsa̍p lâng. Siông-sè khoàⁿ sin lâi ê lâng-sek lóng m̄-sī tuì goá khì pò͘-tō tit-tio̍h; ū-ê sī tuì hoē-iú chio-lâi; khah tsoē sī tuì Siōng-tè kám-tōng hō͘ i chhuì-ta ka-kī lâi-ê. Nā beh m̄-sī Siōng-tè kám-tōng--ê, thái oē tit-tio̍h kìⁿ ū kiâⁿ-lâi lóng bô koh tsáu-khì, iū koh sī ta̍k lé-pài khah ke-thiⁿ, í-liâu ke tsoè tsa̍p-gō͘ liâu chiah ū thang chē.
Kèng chhiáⁿ lia̍t-uī ài kàu-hoē ê tâng-phoāⁿ, tī kî-tó ê tiong-kan thoè oán-lí tē-hng ê kàu-hoē khún-chhiat kî-tó, kiû Tsú m̄-thang hó-hó koh hō͘ goá tsoè kàu pháiⁿ, ǹg-bāng hó koh ke-thiⁿ khah hó, lâi êng-kng lán ê Tsú, lán chiū saⁿ-kap thang hoaⁿ-hí.
(Tân Kî-siông kì-ê).
