首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 論烏鴉，雀鳥仔佮鷹
論烏鴉，雀鳥仔佮鷹
卷期：第351卷 本次： 日期：1914/6 刊名：台灣教會報 頁數：10-11
篇名：論烏鴉，雀鳥仔佮鷹 [ Lūn O͘-a, Chhek-chiáu-á kap Eng ]
作者：
  顯示 : 漢羅 全羅 並列  

論烏鴉，雀鳥仔佮鷹。

1914.6，no.351，pp.10-11

烏鴉咱大家捌看，若是佇較無燒熱的所在，烏鴉有較大隻，有的是兩尺長。烏鴉是長命的鳥隻有捌八十年久的烏鴉。有的愛食活的物親像雞仔囝，鳥鼠。

  烏鴉佇聖經攏總有記烏鴉10擺，咱來揣四位就到額。「放烏鴉出去，烏鴉飛來飛去聽候水焦」(     )。「著試想烏鴉，in無播田，無割稻，無有積siāⁿ，上帝iáu-kú養飼in」。(     )。「烏鴉無通食，伊的囝踮頂面teh哮，chī-chuī 會予伊食mah！」(     )，意思是指有上帝會養飼。烏鴉有時真惡，「騙爸逆母的人，伊的目睭予烏鴉所teh」(     )

雀鳥仔亦攏是上帝的照顧。「雀鳥仔有受通歇，就是治理萬軍的耶和華，我的上帝的大邊」。(     )。「五个雀鳥仔kiám毋是兩分銀賣mah？iáu-kú佇上帝的面前一个亦無袂記得」(     )。有一擺一个艱苦人將伊的事情祈禱；彼祈禱的中間有一句，「我規暝無睏，我成做ná親像厝頂孤單一隻的雀鳥仔」(     )。

咱若愛知鷹是甚物款的禽，若講究舊約通攏知影。鷹siāng大隻是三尺外長，總是彼款的屬佇較寒道的所在。鷹真gâu飛，會飛真遠亦袂倦。「耶和華的確予遠遠的百姓親像鷹teh飛，對地極來攻打恁chiah 的」(     )。「獨獨靠耶和華的人補養伊的精英，親像鷹仔飛來飛去，大步走袂厭，真力行袂siān」(     )。

也通飛真緊，「騎馬的人遠遠來，遍行四方緊緊親像鷹」(     )。「In兩人比鷹較緊，比獅較猛」(     )。閣會飛真懸，「莫得看彼个空空的榮光，因為貨物錢財欲去是緊緊親像鷹仔teh飛，thí翼上到天」(     )。「恁雖然飛懸懸親像鷹作岫佇星的中間，我耶和華予恁墜落去」(     )。鷹真gâu顧鷹仔囝，「親像鷹chhoā囝起來飛佇頂面thí伊的翼，耶和華家己chhoā這个百姓」(     )。「我所行佇埃及的百姓--的，恁也親目看見，譬喻親像大鷹背囝佇翼裡」(     )。

  鷹作岫佇懸懸的所在，保護囝，毋予人來搶，「大鷹飛來飛去作岫佇懸嶺」(     )。「你的岫雖罔懸親像鷹，我耶和華的確予你降落kē」(     )。鷹的爪真長真利，「日過去親像細隻船，勢面親像大鷹thí jiáu jiàu物」(     )。鷹所愛食的就是活的物，親像雞，鴨，猴，羊仔囝。鷹的目睭也真金，對懸所在看地揣所欲食的物，就飛落到地，jiàu彼个某物，後來閣飛懸到岫裡。飼羊抑是雞的人，若看鷹teh杯佇空中真驚。對按呢鷹算是對敵，「耶和華閣講，對敵欲到親像鷹thí翼過來」(     )。「對敵的王欲到親像大鷹緊緊飛，攻擊我耶和華的殿」(     )。鷹也愛食死的物。「身屍所佇teh，鷹鳥聚集」(     )。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461