振替郵便
郭東洋記。
1914.8，no.353，pp.3
振替的路用是予人寄錢去別所在買物較利便較省數。咱愛對別所在的店頭買物的時，較常對郵便局買為替單(就是匯單)，後來將銀單封佇批內寄書留 (就是保險)去予伊。書留4錢重以內郵便錢是一角。總是hoē sîn有兩款。一款叫做小郵替；伊的銀額一張定著是五箍以內；買一張的時著三chiam予郵便做銀單的錢閣一款是通常郵替，伊的銀額一張定著是一百箍以內。設使愛買一張十箍以內的，著六chiam 的銀單錢予郵便，以上若加十箍，銀單錢著加四chiam；親像按呢一百箍，銀單錢著四角二。
若是振替郵便的銀額無限，ná濟ná便宜。若寄一箍以內kan-ta一chiam予郵便，伊就替咱寄；若5箍以內是兩chiam；十箍以內是四chiam；五十箍以內是六chiam；一百箍以內是八chiam。按呢來相比tó一个較省？總是毋是kan-ta 省又閣是郵便替咱寄，不止穩當，無拍無的掛慮，也閣省工。大家若愛寄的時彼个紙通對郵便局討伊就予咱*。彼个紙的後面第二chām有làng一所在，這是愛予寄的人thèng伊寫批，抑是寫物的名佮錢，抑是欲寫逐項代誌攏通。
這pang佇台南冊房有設一號振替郵便是愛圖謀眾大家的利便省數佮穩當閣有憑據。所以大家若愛來買冊的時，抑是寄先生禮予學裡校長攏通寄對冊房來。閣較要緊是大家若寄的時請佇彼張紙後寫明白，若無夠著另外寫批來，阮才好設法。冊房的號頭就是台灣987番。
*這號寄銀的紙叫做振替貯金。 |
