澎湖消息。
李福慶記。
1914.8，no.353，pp.9
佇6月初7日澎湖屬有透真大的北風，彼霎lō͘-sé拄拄出chê，攏予風拍害；chhé-ûn較lím十份一通收，若是其餘通向望就是塗豆，番薯較大頭nā-tiāⁿ。無拍算大風傷袂著的就出草蜢真濟teh食，若去園裡看無看見甚物，專專是草蜢鋪地。此時警官吩咐逐戶出一跤布袋拆開，用濟濟跤接做一領親像圍魚的網，cha̍h佇園頭園尾用竹篙趕，一pó一pó掠幾若布袋，對我出世到taⁿ未捌看見遐爾非常濟。
到7月7號(論5：15)有做大風颱；頭日北風就紲起鹹水，到吹8號轉東南，不止透會予人驚，到半暝才煞。厝頂有小可傷害，有兩隻大帆船破去。若是塗豆番薯，以及各項的園貨枝葉攏焦了了；總是塗豆kiám-chhái若會puh芛，就看有淡薄仔通收成。
佇舊年有好年冬大家真奢華，各鄉社搬戲賽會敬佛真鬧熱開錢不少。到今年遇著一號的光景真無話通講。 |
