Tāi-chèng Phok-lám-hoē.
Âng Iok-seng kì.
1914. 10, no. 355, pp. 5
Kin-nî 4 ge̍h bé Pún-kok ū khui Tāi-chèng Phok-lám-hoē tī Tang-kiaⁿ Siōng-iá kong-hn̂g. Lāi-bīn ū khí tsoē-tsoē teh pâi-lia̍t mi̍h ê chhù, kiò-tsoè koán. Só͘ pâi-lia̍t ê mi̍h-kiāⁿ, ū-ê hun só͘-chāi, ū-ê hun luī; chhin-chhiūⁿ Tâi-oân ê chhut-phín sī pâi tī Tâi-oân koán, goā-kok ê mi̍h pâi tī Lông-gia̍p koán; chiàu án-ni hun-piat ū Kàu-io̍k Ha̍k-gē koán, Chuí-sán koán, Kang-gia̍p koán, Bí-su̍t koán, Tang-kiaⁿ te̍k-pia̍t koán, Jiám-chit koán, Boán-chiu Hoa-thài koán, Lîm-gia̍p koán, Ki-hâi koán, ūn-su koán, Lâm-iûⁿ koán, Tiâu-sián koán, Khòng-sán koán; chiah ê kok keng koán ū ēng tsoē-tsoē chhut-miâ siōng-téng ê mi̍h lâi pâi, iā ū-ê teh boē; chhin-chhiūⁿ Tâi-oân koán ū teh boē thn̂g, iā piⁿ-á ū chèng kam-chià; Tiâu-sián koán tē-it chhut-miâ sī Ko-lê-sam iā ū chèng Ko-lê tsâng kui khu teh hō͘ lâng khoàⁿ. Ki-hâi koán, m̄-nā pâi-lia̍t ki-hâi nā-tiāⁿ, iā ū si̍t-ēng, chhin-chhiūⁿ chè-tsoá, chè-hún, tsoè-mī. Tiong-kok só͘ chhut ê mi̍h khah tsoē sī tiû-toān, kó͘-bu̍t, jī-oē, kî-tiong ū chi̍t-pak-oē tēng-kè chi̍t bān kho͘. Kî-goā tsoē-tsoē, kóng iā boē chīn; nā beh khoàⁿ kàu chheng-chhó, káⁿ tio̍h tsa̍p ji̍t khah ke. Chiah ê mi̍h put-tān teh hō͘ lâng khoàⁿ lāu-jia̍t, sǹg sī teh tàu su-iâⁿ, ǹg-bāng tit-tio̍h po-tsn̄g, hō͘ hit hāng mi̍h khah ū miâ-siaⁿ; chhin-chhiūⁿ Moâ-tāu ê Bûn-tàn-iū, Sū-lîm to-á ê chhut-miâ. Tiong-kan Kàu-hoē iā ū chhut-phín, ū Sèng-keng kuí-nā pah pún, jī kap khiuⁿ-kháu lóng bô tâng; iā ū pun toaⁿ hō͘ lâng tsai hiān-kim tē-kiû-chiūⁿ ū hoan-e̍k Sèng-keng 450 khiuⁿ-kháu, iā kū-nî ū boē chhut 800,0000 pún.
Koh hoē-tiûⁿ ê goā-bīn, ū thong-kok ê seng-lí-tiàm kuí-nā tsa̍p keng; teh boē in pún só͘-tsāi ê bêng-sán-bu̍t, sūn ki-hoē kóng-kò hō͘ lâng tsai.
Tiong-kan ū chi̍t-keng lāi-bīn pâi í oē iông-ún-tit 100 goā lâng, goā-bīn ū siá kóng, "Ji̍t-pún Ki-tok Kàu-hoē, uī-tio̍h Tāi-chèng Phok-lám-hoē toā thoân-tō." Tāi-ke put-chí ióng-kám, muí-ji̍t tuì tsá-khí 10 tiám kàu ê-hng 9 tiám, thoè Tsú tsoè kang bô hiâm ià-siān; ū-ê tiàm koe-lō͘ chhiáⁿ lâng-kheh, pun-toaⁿ, ū-ê gîm-si ji̍h-khîm; m̄-nā tsa-po͘, hū-jîn-lâng iā teh tàu pang-tsān. ián-soat ê sian-siⁿ sī tuì kuí-nā só͘-tsāi lâi, muí lâng lûn-liû ián-soat 20 hun á-sī 30 hun cheng. iā ū lēng siat chi̍t ê só͘-tsāi, hō͘ hoān-nā ài káng-kiù mn̄g ê thang tī hia chia̍h-tê tâm-lūn. Chit-ê pò͘-tō-hoē ê ki-hoē chin hó, muí pái moá lāi-bīn, thiaⁿ-ê khah tsoē sī tuì sì-hng lâi-ê, án-ni kong-hāu sǹg m̄-sī sió-khoá.
Tuì Tāi-chèng Phok-lám-hoē lâi koan-khoàⁿ Ki-tok ê kàu-hoē, oē-tit jú tsai Siōng-tè chiong to̍k-siⁿ ê Kiáⁿ lîm-kàu sè-kan, chín-kiù i ê peh-sìⁿ; m̄-nā chi̍t-ke chi̍t-tso̍k, sī sè-kan bān-hāng bān-kok. iā tsai Tsú ê kng ū chiò tī thong sè-kan; si̍p-jī-kè ê Tek-sèng-kî ta̍k uī lóng teh chìn-chêng. Só͘-í lán tio̍h jú oá-khò Sèng-sîn ê toā khuì-la̍t, lâi oân-tsoân Pē Siōng-tè kap Tsú só͘ hoan-hù ê bēng-lēng. Tio̍h o̍h Pó-lô bô lia̍h Ki-tok ê hok-im tsoè kiàn-siàu, hó-táⁿ kan-chèng tō-lí tī lán ê sì-uî.
