青盲人的批。
李秋金寄。
1914.10，no.355，pp.12
這張批是對泉州寄；也是用手鑿點的膨字寫的，因為彼个好朋友的目睭看袂著。伊講：-
批寄予甘牧師收。我佇陰曆年2月25號有接著你的批，心肝歡喜ná見著你的面。我會通做傳道的工就是對你gâu講究紲設法。我做這號的工已經15年久。起頭佇泉州一年；彼時無甚物好機會；所得著有六七人nā-tiāⁿ。後來去南灣蹛8年久。佇遐機會真好；因為我永時出門傳道理濟濟人歡喜來聽。在南灣所得著的人有20外定著來聽道理，12个入教。後來先生派我閣再去蹛泉州南門的禮拜堂。我蹛遐一年久；總是無人chhoā我佇彼个真鬧熱的所在四界講道理，所以引chhoā人較少；就是10外人nā-tiāⁿ。了後我受派著佇安溪堂會屬的當坑做工。佇遐蹛5年久；機會真好，因為有兄弟常常chhoā我出門巡街講道理；所以有加30外人來聽，10外人入教。可惜！彼時土匪大興，我姑不將著辭工；毋kú我的心平安，因為上帝予阮攏無欠。我一家有四个人，兩个囝。Taⁿ愛問，台南有幾个青盲人teh做教會的工？現在有設學mah？我向望會閣得著你的批。我較常蹛佇安溪烏頭的禮拜堂，佇遐一晡講道理。 |
